ԵՐԵՎԱՆ, 22 հուլիսի – Sputnik. Նորընտիր Ազգային ժողովի առաջին նստաշրջանը կգումարվի օգոստոսի 2-ին։ Այս մասին ԿԸՀ արտահերթ նիստում հայտարարեց ԿԸՀ նախագահ Տիգրան Մուկուչյանը։
«8-րդ գումարման Ազգային ժողովի առաջին նստաշրջանի հրավիրման օր է հայտարարվում 2021 թվականի օգոստոսի 2-ը՝ ժամը 10։00-ին», - ասաց նա։
ԿԸՀ-ն նաև որոշում է կայացրել տեղական ինքնակառավարման մարմինների ընտրություններն անցկացնել հոկտեմբերի 17-ին և նոյեմբերի 14-ին։
Հանձնաժողովի մեկ այլ արձանագրային որոշմամբ հաստատվել են նորընտիր խորհրդարանի պատգամավորների մանդատները, ինչպես նաև ուժը կորցրած է ճանաչվել 20 թեկնածուների գրանցումը, քանի որ նրանք ինքնաբացարկ էին հայտնել:
Ովքե՞ր կլինեն նոր ԱԺ–ում. խորհրդարան անցած քաղաքական 3 ուժերի ցուցակները հայտնի են
Ինքնաբացարկ հայտնած 20 թեկնածուներից 17-ը ՔՊ-ից են, 3-ը՝ «Հայաստան» դաշինքից:
Հիշեցնենք, որ հունիսի 20-ին կայացած խորհրդարանական արտահերթ ընտրություններում անցողիկ շեմը հաղթահարել են «Քաղաքացիական պայմանագիր» կուսակցությունը (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
Ով կստանա ԱԺ փոխնախագահի` ընդդիմության աթոռը. «Հայաստան» դաշինքում հարցը որոշված է
