ԵՐԵՎԱՆ, 20 հուլիսի - Sputnik. Տարածքային կառավարման և ենթակառուցվածքների նախարարի պաշտոնակատար Սուրեն Պապիկյանը Գյումրիում շուրջ 4 միլիարդ 300 միլիոն դրամի ներդրումներ է խոստանում։
Այս մասին Պապիկյանը գրառում է արել Facebook-ում` հայտնելով, որ դրանք իրականացվելու է Հայաստանի տարածքային զարգացման հիմնադրամի «Տեղական տնտեսության եւ ենթակառուցվածքների զարգացման» ծրագրի շրջանակում`ՀՀ կառավարության և Համաշխարհային բանկի ֆինանսավորմամբ։
«Մասնավորապես` կիրականացվեն Խանջյան, Չայկովսկու, Աճեմյան, Հանեսօղլան, Ջիվանի, Տերյան և Նալբանդյան փողոցների, ինչպես նաև` Հաղթանակի պողոտայի վերականգնում, Գյումրու քաղաքային Բարեկամություն զբոսայգու վերակառուցման նախապատրաստման աշխատանքներ, Սբ․ Ամենափրկիչ եկեղեցու հարակից այգու և հարող Աբովյան փողոցի` աջ և ձախ հատվածների վերականգնում»,– նշում է Պապիկյանը։
Նախարարի պաշտոնակատարը նաև հիշեցնում է, որ Գյումրիում «Տեղական տնտեսության և ենթակառուցվածքների զարգացման» ծրագրի շրջանակում արդեն իրականացվել են Շիրազի, Վարպետաց, Ջիվանու, Ղորղանյան և Աբովյան փողոցների վերանորոգման աշխատանքները։
Գյումրիում դիմակավորված անձը թալանել է տարեց ամուսիններին ու կրակել տղամարդու ուղղությամբ
Պապիկյանը նաև լուսանկար է հրապարակել, որում կարմիրով նշված են այն ճանապարհները, որոնք պետք է նորոգվեն, կապույտով՝ արդեն նորոգվածները։
