ԵՐԵՎԱՆ, 17 հուլիսի - Sputnik. Եվրամիությունը ցանկանում է իր ներգրավվածությունն ավելացնել այս տարածաշրջանում, ամրապնդել կապերը տարածաշրջանի երկրների հետ։ Ամփոփելով ՀՀ վարչապետի պաշտոնակատար Նիկոլ Փաշինյանի հետ բանակցությունները՝ այսօր հայտարարեց Եվրոպական խորհրդի նախագահ Շառլ Միշելը։
Նա տեղեկացրեց՝ վաղը մեկնում է Ադրբեջան, իսկ երկուշաբթի արդեն Վրաստանում կլինի՝ նաև այդ երկրների ղեկավարների հետ բանակցություններ անցկացնելու։ Նպատակներից է դեկտեմբերին անցկացվելիք «Արևելյան գործընկերության» երկրների գագաթնաժողովի նախապատրաստումը։
«Բոլորս ազդված ենք այդ պատերազմի հետևանքից, որը հարվածել է Հայաստանին։ Եվրամիությունը պատրաստ է աջակցել ԵԱՀԿ Մինսկի խմբի շրջանակում կատարված աշխատանքներին»,- նշեց Միշելը։
Նա ընդգծեց`կան չորս թեմաներ, որոնց անհրաժեշտ է անդրադառնալ կարճաժամկետ, միջնաժամկետ և երկարաժամկետ կտրվածքով այս տարածաշրջանում բարօրություն և կայունություն հաստատելու համար։ Եվրոպական խորհրդի նախագահի խոսքով՝ առաջին կետը չափավոր հռետորաբանությունն է, անհրաժեշտ է փորձել խուսափել ագրեսիվ հռետորաբանությունից։ Երկրորդ կետը սահմանազատումն է. Եվրամիությունը հույս ունի, որ հնարավոր կլինի այս հարցում խաղաղ բանակցություններ սկսել։ Միշելի խոսքով՝ կարևոր է, որ երկու կողմերն էլ նահանջեն վիճելի տարածքներից, որ հնարավոր լինի քննարկումներ իրականացնել։ Երրորդ կետը վերաբերում է տարածաշրջանային կոմունիկացիաների շուրջ բանակցություններին, իսկ չորրորդը խաղաղության շուրջ բանակցությունն է։
Հիշեցնենք՝ Եվրոպական խորհրդի նախագահ Շառլ Միշելը Հայաստան է ժամանել հուլիսի 16-ին. նրան դիմավորել է փոխվարչապետի պաշտոնակատար Մհեր Գրիգորյանը։
Միաժամանակ, ՀՅԴ երիտասարդները հյուրանոցի մոտ, ուր պետք է օթևաներ Միշելը, բողոքի ակցիա էին իրականացրել՝ ընդդեմ ԵՄ ներկայացուցչի Հայաստան այցի։ Նրանք անգլերենով վանկարկում էին «Ամոթ ձեզ»։
«Դուք լուռ էինք, երբ պատերազմի ընթացքում մեր դեմ կիրառում էին ֆոսֆորային զենքեր։ Դուք լուռ էիք, երբ պատերազմի ընթացքում զոհվում էին անմեղ քաղաքացիներ։ Դուք նաև հիմա եք լռում, երբ ՀՀ իշխանությունը բանտարկում է նրանց, որոնք ընդդիմադիր հայացքներ ունեն»,–ասում էին բողոքի ակցիայի մասնակիցները։
Որոշ ժամանակ անց, երբ Միշելը մուտք գործեց հյուրանոց, ՀՅԴ-ական երիտասարդները հեռացան։
