ԵՐԵՎԱՆ, 14 հուլիսի – Sputnik. ՀՀ վարչապետի պաշտոնակատար Նիկոլ Փաշինյանը շնորհավորական ուղերձ է հղել Ֆրանսիայի նախագահ Էմանուել Մակրոնին՝ Ազգային տոնի կապակցությամբ: Տեղեկությունը հայտնում է ՀՀ վարչապետի մամուլի ծառայությունը։
«Անվիճելի է, որ Հայաստանի ու Ֆրանսիայի միջև ընդհանուր արժեքների և դարավոր բարեկամության վրա հիմնված երկկողմ հարաբերությունները կրում են առանձնաշնորհյալ բնույթ։ Երկու պետությունների միջև բացառիկ քաղաքական երկխոսությունը թույլ է տալիս հաջողությամբ համագործակցել փոխադարձ հետաքրքրություն ներկայացնող բազմաթիվ ծրագրերի ու հարցերի շուրջ»,–նշել է Փաշինյանը։
Նա շեշտել է, որ նախորդ տարի տեղի ունեցած ողբերգական իրադարձությունների համատեքստում (արցախյան 44–օրյա պատերազմը,–խմբ.) Հայաստանն իր անկեղծ երախտագիտությունն է հայտնում բարեկամ Ֆրանսիային՝ անաչառ դիրքորոշման և Հայաստանի ու Արցախի խաղաղ բնակչությանը ցուցաբերած աջակցության համար։
«Ֆրանսիան և ֆրանսիացիները հերթական անգամ մեր կողքին էին պատմական այս դժվար շրջափուլում»,– ընդգծել է վարչապետի պաշտոնակատարը:
Փաշինյանի խոսքով`Հայաստանը մեծապես կարևորում է ԵԱՀԿ Մինսկի խմբի համանախագահության ձևաչափով Ֆրանսիայի ամուր ներգրավումը
Լեռնային Ղարաբաղի հակամարտության խաղաղ կարգավորման գործընթացում:
«Մենք բարձր ենք գնահատում Ֆրանսիայի ջանքերը հայ ռազմագերիների տուն վերադարձի և Լեռնային Ղարաբաղում հայկական մշակութային ժառանգության պահպանության հարցերում։ Ակնկալում եմ առաջիկայում հյուրընկալել Ձեզ Հայաստանում՝ պետական այցով»,–նշել է նա:
«Թանկագին Նիկոլ». Մակրոնը շնորհավորել է Փաշինյանին
ՀՀ վարչապետի պաշտոնակատարը Ֆրանսիայի Ազգային տոնի կապակցությամբ Մակրոնին մաղթել է քաջառողջություն, անկոտրում կամք և հաղթանակներ բոլոր նախաձեռնություններում, իսկ ֆրանսիացի ժողովրդին՝ խաղաղություն և բարօրություն։
Նշենք, որ Հայաստանի վարչապետի պաշտոնակատար Նիկոլ Փաշինյանն աշխատանքային այցով մայիսի 31–ին մեկնեց Ֆրանսիա։ Փաշինյանը Փարիզում հանդիպեց Ֆրանսիայի Ազգային ժողովի նախագահ Ռիշար Ֆերանի և Ֆրանսիայի նախագահ Էմանուել Մակրոնի հետ։
Ֆրանսիայի նախագահը Հայաստան է այցելել 2018 թվականի հոկտեմբերի 11–ին` մասնակցելու Ֆրանկոֆոնիայի միջազգային կազմակերպության գագաթնաժողովին։
ՌԴ փոխարտգործնախարարն ու Ֆրանսիայի դեսպանը խոսել են Արցախի մասին
