ԵՐԵՎԱՆ, 13 հուլիսի – Sputnik. «Հարավկովկասյան երկաթուղի» փակ բաժնետիրական ընկերությունը սկսել է կորոնավիրուսի դեմ պատվաստել աշխատակիցներին։ Տեղեկությունը հայտնում է ընկերության մամուլի ծառայությունը։
«Երկաթուղայինների առողջությունը ընկերության համար առաջնային խնդիր է։ Կորոնավիրուսի համաճարակի պատճառով երկաթուղում շարունակում են գործել կանխարգելիչ միջոցներ, ինչը, սակայն, բավարար չէ մեր աշխատակիցներին Covid-19-ով վարակվելուց առավելագույնս պաշտպանելու համար»,–նշված է հաղորդագրության մեջ:
Առաջին հերթին պատվաստումները կստանան ուղևորների հետ անմիջականորեն աշխատող մասնագետները. ուղեկցորդներ, գնացքների պետեր, լոկոմոտիվային բրիգադներ, գանձապահներ:
ՀՀ–ում կորոնավիրուսի դեմ ավելի քան 108 հազար պատվաստում է կատարվել
Նշվում է, որ «Սպուտնիկ V» պատվաստանյութի առաջին 60 դեղաչափերն արդեն տրամադրվել են Հայաստանի առողջապահության նախարարության կողմից:
Ապագայում նման համագործակցությունը կշարունակվի, պատվաստումների գործընթացը կլինի շարունակական:
