ԵՐԵՎԱՆ, 12 հուլիսի – Sputnik. Հարուցվել է քրեական գործ՝ Գորիսի համայնքապետարանում հայտնաբերված 38 մլն 440 հազար դրամի չարաշահումների առթիվ։ Տեղեկությունը հայտնում է Հայաստանի քննչական կոմիտեն։
Նշվում է, որ 2021-ի մարտին ՀՀ պետական վերահսկողական ծառայության կողմից Գորիսի համայնքապետարանում իրականացվել է ուսումնասիրություն՝ 2016-ի հունվարի 1-ից մինչև 2021-ի ապրիլի 30-ն ընկած ժամանակահատվածում համայնքապետարանին հատկացված պետական միջոցների տրամադրման համար հիմք հանդիսացող տեղեկատվության արժանահավատությունը գնահատելու նպատակով:
Արձանագրվել են տարաբնույթ խախտումներ, մասնավորապես հաշվարկված և վճարված, սակայն փաստացի չկատարված աշխատանքներ, շինարարական աշխատանքների անհիմն թանկացման արդյունքում կատարողական ակտերով ավել հաշվարկված և վճարված գումարներ, ոչ նպատակային ծախսեր։
Այս ամենի արդյունքում նախնական տվյալներով պետությանը պատճառվել է 38.440.000 ՀՀ դրամի վնաս։ Արձանագրվել է նաև, որ համայնքապետարանը օտարել է մի շարք ավտոմեքենաներ։
Ձերբակալվել է Գորիս համայնքի Քարահունջ բնակավայրի վարչական ղեկավարը
Հայտնաբերված խախտումների շուրջ պարզաբանումներ ներկայացնելու նպատակով Գորիսի համայնքապետարանի համապատասխան պաշտոնատար անձինք հրավիրվել են ՀՀ քննչական կոմիտե բացատրություն տալու, սակայն չեն ներկայացել:
ՀՀ քննչական կոմիտեի հատկապես կարևոր գործերի քննության գլխավոր վարչությունում հարուցվել է քրեական գործ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով, 308-րդ հոդվածի 2-րդ մասով, 314-րդ հոդվածով և 325-րդ հոդվածի 1-ին մասով (առանձնակի խոշոր չափերով խարդախություն, պաշտոնեական լիազորությունների չարաշահում, պաշտոնեկան կեղծիք, փաստաթղթերի կեղծում):
Կատարվում է նախաքննություն, ձեռնարկվում են գործողություններ դեպքերի բոլոր հանգամանքները պարզելու, առերևույթ հանցագործություն կատարած անձին (անձանց) հայտնաբերելու, համայնքին պատճառված վնասը վերականգնելու ուղղությամբ:
Նորաոճ նստարաններ` Գորիսում. դիզայնի հեղինակները համայնքի երիտասարդներն են
