ԵՐԵՎԱՆ, 12 հուլիսի – Sputnik. Մեղրիի նախկին համայնքապետ Մխիթար Զաքարյանի փաստաբան Երեմ Սարգսյանն այսօր ՀՀ քննչական կոմիտեի շենքի մոտ լրագրողների հետ ճեպազրույցում նշեց, որ իր պաշտպանյալի բերման ենթարկելու ձևն արդեն վկայում է, որ իրավապահները բոլոր նորմերն անցել են։
«Ինքնակամ ներկայացած, իրենից որևէ վտանգ չներկայացնող անձին ոստիկանության շենքի մոտ նման կերպով ձևականորեն իբր բերման ենթարկելը ակնհայտ է, որ այլ նպատակ էր հետապնդում»,– ասաց նա։
Փաստաբանի գնահատմամբ` տվյալ դեպքում անգամ ինքնաձիգներով զինված անձանց ներկայությունն ինքնին լիազորությունների անցում է։
Սարգսյանի խոսքով` Զաքարյանին բերման ենթարկելը պատճառաբանվում է նրանով, որ մի քանի անգամ փորձել են ներկայանալու ծանուցում ուղարկել, բայց տանը մարդ չի եղել։ Փաստաբանը, հակառակը, պնդում է, որ քաղաքապետն ինքն է զանգահարել ու ասել, որ տանը մարդ կա, կարող են բերել ծանուցագիրը, բայց չեն բերել։
Հիշեցնենք` Երեմ Սարգսյանն այսօր առավոտյան հայտնել էր, որ Մեղրի համայնքի արդեն նախկին ղեկավար Մխիթար Զաքարյանին բերման են ենթարկել։
Նա մասնավորապես նշել էր, որ ոստիկանության բարձրաստիճան պաշտոնյաների հետ բանավոր պայմանավորվածության համաձայն՝ կեսգիշերին ինքն ու Զաքարյանը գնացել են քրեական ոստիկանության գլխավոր վարչության շենք, մտել ներս և հայտնել, որ պայմանավորվածության համաձայն ինքնակամ ներկայացել են։
Ըստ նրա` ոստիկանները ձևացրել են, թե տեղյակ չեն` ինչու են իրենք եկել և առաջարկել են սպասել, մինչև ճշտեն։ Այդ ընթացքում շենքի մեկ այլ մուտքից դուրս են եկել ոստիկանական 2 միկրոավտոբուսներ, որոնցից դուրս են եկել բազմաթիվ դիմակավորված ու ինքնաձիգավոր անձինք, Մխիթար Զաքարյանին պառկեցրել գետնին, նկարահանել, որից հետո բռնությամբ ներս տարել։
Փաստաբանը նաև հայտնել էր, որ այդ ամբողջ ընթացքում խոչընդոտվել է Զաքարյանի փաստաբանների գործունեությունը։
Հիշեցնենք, որ հուլիսի 11-ին ՀՀ ԿԸՀ–ն բավարարել էր դատախազության միջնորդությունը՝ Մեղրի համայնքի նախկին քաղաքապետ, «Հայաստան» դաշինքի պատգամավորության թեկնածու Մխիթար Զաքարյանի նկատմամբ քրեական հետապնդում հարուցելու ու նրան կալանավորելու թույլտվություն տալու մասին:
Հուլիսի 9–ին Մխիթար Զաքարյանը հրաժարվել էր համայնքի ղեկավարի պաշտոնից և նշել, որ ամենայն հավանականությամբ կգնա խորհրդարան։
