ԵՐԵՎԱՆ, 9 հուլիսի - Sputnik. ՀՀ առողջապահության նախարարությունը ներկայացրել է երկրում կորոնավիրուսով պայմանավորված կարանտինի ռեժիմը ևս վեց ամիսով երկարացնելու նախագիծ։ Տեղեկությունն այսօր լրագրողների հետ ճեպազրույցում հայտնել է Առողջապահության նախարարի պաշտոնակատար Անահիտ Ավանեսյանը։
«Նախագիծն արդեն կառավարությունում է, և կարծում եմ, որ արդեն այսօր համապատասխան որոշում կկայացվի», - ասաց նա:
Նախարարի պաշտոնակատարը հավելել է, որ դա պետք է, որպեսզի գերատեսչությունն ունենա գործիքակազմ որոշակի սահմանափակումներ մտցնելու կամ վերացնելու համար, եթե դրա անհրաժեշտությունը լինի: Նա հավելել է, որ անգամ Հայաստան ժամանելիս թեստավորում անցնելու պահանջը գործում է կարանտինային ռեժիմի շրջանակներում:
Նախարարի պաշտոնակատարը հայտնել է, որ այժմ համաճարակաբանական իրավիճակը վերահսկելի է, սակայն գերատեսչությունը մշակում է նոր սահմանափակումների և որոշ խմբերի համար պարտադիր պատվաստումների սահմանման հնարավորությունը, քանի որ կրթական գործընթացի մեկնարկով վարակի հայտնաբերված դեպքերի թիվը կարող է կտրուկ աճել:
«Նախագիծը մշակման փուլում է և շուտով կներկայացվի հանրությանը։ Որոշ դեպքերում, եթե քաղաքացին հրաժարվում է պատվաստվել, ապա պետք է կորոնավիրուսի վերաբերյալ բացասական թեստ ներկայացնի», - նշել է նա։
Իրավիճակը վերահսկելի է. նախարարը ներկայացրել է պատվաստումների վիճակագրությունը
Նշենք, որ Հայաստանում 2020թ. մարտի 16-ից սեպտեմբերի 11-ը գործել է արտակարգ դրություն։ Այնուհետև երկրում կարանտին է սահմանվել, որը կտևի մինչեւ 2021 թվականի հուլիսի 11-ը: Հուլիսի մեկից Առողջապահության նախարարությունը չեղյալ է հայտարարել է բաց տարածքներում քաղաքացիների դիմակ դնելու պարտադրանքը։
