ԵՐԵՎԱՆ, 8 հուլիսի – Sputnik. ՀՀ վարչապետի պաշտոնակատար Նիկոլ Փաշինյանը ոստիկանության պետ Վահե Ղազարյանի հետ այսօր վաղ առավոտյան այցելել է ոստիկանության պարեկապահակակետային ծառայության գունդ, որտեղ ներկա է եղել շարային ստուգատեսին:
Փաշինյանը շնորհավորել է Պարեկային ոստիկանության ծառայության մեկնարկի առիթով: «Սա մեր կառավարության կարևորագույն բարեփոխումներից մեկն է, որը տեղավորվում է ոստիկանության բարեփոխումների տրամաբանության մեջ: Բայց իրականում մենք սա պետք է ավելի լայն համատեքստում դիտարկենք՝ իրավակարգի, պետություն-քաղաքացի, ոստիկան-քաղաքացի հարաբերությունների, բարեփոխումների տրամաբանության մեջ», ասել է նա:
Փաշինյանի խոսքով, Պարեկային ծառայությունը «ոստիկանություն-քաղաքացի» համագործակցության ու փոխօգնության խորհրդանիշներից մեկն է, որն սկսվելով Երևանում ու պետք է տարածվի ՀՀ բոլոր քաղաքներում ու գյուղերում։
«Հայաստանի Հանրապետության ժողովուրդը կառավարությանը տվել է իրավունքի և օրենքի դիկտատուրա հաստատելու մանդատ, և ՀՀ քաղաքացիները Պարեկային ոստիկանության ծառայության արդյունքում պետք է իրավակարգի, կարգուկանոնի նոր որակ տեսնեն մայրաքաղաք Երևանի փողոցներում: Եվ ահա այս կարևորագույն առաքելությունն է, որ դուք պետք է իրականացնեք»,– ասել է վարչապետի պաշտոնակատարը:
Այնուհետև Նիկոլ Փաշինյանը Վահե Ղազարյանի ուղեկցությամբ ծանոթացել է Պարեկային ծառայության նոր ավտոմեքենաների հագեցվածությանը, որոնք համալրված են տեխնիկական ու հատուկ ժամանակակից միջոցներով:
Վարչապետի պաշտոնակատարը նաև ծաղիկներ է խոնարհել ծառայողական պարտականությունները կատարելիս զոհված ոստիկանության ծառայողների հիշատակը հավերժացնող հուշակոթողին:
Հիշեցնենք, որ պարեկային ոստիկանության ծառայողներն առաջին անգամ ծառայության են դուրս եկել Երևանում երեկ՝ հուլիսի 7-ին։
