ԵՐԵՎԱՆ, 7 հուլիսի – Sputnik. Մարդասիրական արձագանքման ռուսական կենտրոնը Ղարաբաղում ավելի քան 2000 մարդասիրական ակցիա է իրականացրել` կարիքավորներին տրամադրելով առաջին անհրաժեշտության իրեր, սննդամթերքի հավաքածուներ, ավելի քան 30,2 տոննա ընդհանուր քաշով դեղորայք։ Տեղեկությունը հայտնում է ՌԴ ՊՆ մամուլի ծառայությունը։
«Ռուս ռազմական բժիշկները բուժօգնություն են ցուցաբերել ԼՂ ավելի քան 1500 բնակչի։ Հիվանդանոցներին և գյուղական բուժկետերին առաջին անհրաժեշտության 2810 կգ դեղորայք, հակաբորբոքային միջոցներ, վիրակապական նյութեր և այլ գույք է հատկացվել։ Քաղաքային հիվանդանոցներին է փոխանցվել բժշկական տարբեր սարքավորումների ավելի քան 600 միավոր», – գրված է հաղորդագրության մեջ։
Վերականգնվել է ավելի քան 80 կմ էլեկտրահաղորդման գիծ, ավելի քան 30 տրանսֆորմատորային ենթակայան, ինչը թույլ է տվել էլեկտրականությամբ ապահովել 63 բնակավայր։ Նոր ջրատարների անցկացման շնորհիվ 14 բնակավայր ապահովվել են ջրով։
Ռուս խաղաղապահները սահմանազատման գծի մոտ գտնվող վանքեր են ուղեկցել ավելի քան 1750 ուխտավորի։
2020 թվականի նոյեմբերի 23-ից ի վեր ռուս ռազմական ինժեներների և Միջազգային հակաականային կենտրոնի մասնագետները չպայթած ռազմամթերքից մաքրել են ընդհանուր առմամբ 2165 հա տարածք, 657,3 կմ ճանապարհահատված, 1 892 շենք, այդ թվում 30 սոցիալական կարևոր նշանակության օբյեկտներ, հայտնաբերել և վնասազերծել են 25 640 պայթյունավտանգ առարկա։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
