ԵՐԵՎԱՆ, 6 հուլիսի – Sputnik. Հայաստանում Audi-ի պաշտոնական ներկայացուցիչ «Սլավ Մոթորս» ընկերությունը Երևանում ներկայացրել է նոր Audi Q5-ը: Ամենագնացը թարմացրել է ոճը և մեքենաների սիրահարներին ներկայանում է միանգամայն նոր դիզայնով։ Ավտոմեքենայի առաջնամասը՝ բարձր տեղակայված օդահավաքով և ռադիատորի լայն, հարթ, ութանկյուն քողարկիչով, մեքենային միանգամայն նոր, սպորտային կերպար է տալիս։ Դինամիկ արտաքին տեսքը ներդաշնակ կերպով լրացնում են արտանետման խողովակների սեղանաձև գլխիկները, լայնակի շերտաձողով դիֆուզորը և քրոմապատ գիծը՝ հետևի լուսարձակների տակ։
Զգալի փոփոխությունների է ենթարկվել նաև թարմացված տարբերակի էլեկտրոնային պլատֆորմը` լիովին նորացվել են լուսարձակները։ Պոտենցիալ գնորդներին քրոսսովերը ներկայանում է նաև նոր ներքին հարդարանքով, որը պատրաստված է թանկարժեք, բարձրորակ նյութերից։ Չպետք է մոռանալ նաև մուլտիմեդիա համակարգի մասին։ Դժվար է երկար ուղևորությունները պատկերացնել առանց որակյալ երաժտության։ Դա հիանալի հասկանում են նաև ինժեներները, որոնք նոր Q5-ի մեջ, ինչպես ասում են, ամբողջ հոգին են դրել։
«Սլավ Մոթորսի» գլխավոր տնօրեն Արտյոմ Սիմոնյանի խոսքով՝ ընկերության համար Q սերիան շատ կարևոր է Audi-ի բոլոր մոդելների շարքում, հաշվի առնելով ինչպես Հայաստանի ռելիեֆը, այնպես էլ այդ ավտոմեքենաների հատկությունները։
«Audi ամենագնացները խիստ պահանջված են Հայաստանի ավտոսիրողների շրջանում: Դրանց շարքում առանձնանում է Q5-ը։ Այն շատ կոմպակտ է, հարմար է ինչպես քաղաքում վարելու, այնպես էլ երկարատև ուղևորությունների համար, այդ թվում՝ վատ ճանապարհներին։ Տարողունակ բեռնախցիկի շնորհիվ մեքենան նաև շատ հարմար է ընտանեկան ուղևորությունների համար»,-ասաց նա լրագրողներին ավտոմեքենան ներկայացնելիս։
Հայկական շուկա մատակարարվող քրոսսովերներն առավելագույնս հարմարեցված են Հայաստանում և Եվրասիական տնտեսական միությունում գործող ստանդարտներին, տեխնիկական առանձնահատկություններին և օրենսդրական պահանջներին։
Մեքենան հագեցած է 2–լիտրանոց տուրբոշարժիչով, որն աշխատում է անմիջական ներարկման համակարգով` զարգացնելով մինչև 250 ձիաուժ հզորություն: Այս ամենը, 8-աստիճան ավտոմատ փոխանցման տուփի հետ միասին, մեքենան իսկական սպորտքար են դարձնում։ Միաժամանակ, անմիջական ներարկման համակարգի շնորհիվ շարժիչը խիստ տնտեսող է։
Խոսելով ընթացքի հնարավորությունների մասին, պետք է նշել, որ տվյալ կոմպլեկտավորման մեքենան օժտված է quattro ultra լիաքարշակ համակարգով, որը քարշիչ ուժը լավագույնս բաշխում է սռնիների միջև։
«Quattro լիաքարշակ համակարգը, որով սկսել են հագեցնել Audi-ները դեռ անցյալ դարի 80-ականներից, Audi-ի յուրատեսակ «գենետիկ կոդն է» դարձել, դրա գլխավոր տարբերանշանը։ Բոլոր Q մոդելները, բացառությամբ Q3-ի որոշ կոմպլեկտավորումների, հագեցած են լիաքարշակ համակարգով։ Դա կատարյալ լիաքարշակ համակարգ է, չեմ վախենա «կատարյալ» բառից»,-ասում է ընկերության ղեկավարը։
Էլեկտրոնային կարգավորումով և անաստիճան ադապտիվ դեմփֆերային համակարգով օդամղիչ կախոցը՝ բոլոր չորս անիվների վրա, ինքնուրույն կարգավորում է ճանապարհային տատանումներն ու ամորտիզատորների կոշտությունը։ Բացի այդ, Audi drive select-ը վարորդին թույլ է տալիս ավտոմեքենայի կարևորագույն համակարգերի աշխատանքը կարգավորել ըստ ճանապարահային պայմանների և ընթացքի ռեժիմի։
Սիմոնյանի խոսքով՝ Audi Q5-ը, որպես պրեմիում հատվածի վառ ներկայացուցիչ, հաճախորդներին տարբերակների հարուստ հավաքածու է առաջարկում, միաժամանակ ավտոմեքենան ընտրելիս գնորդը կարող է լրացուցիչ օպցիաներ և հնարավորություններ «պատվիրել»:
