ԵՐԵՎԱՆ, 3 հուլիսի – Sputnik. Բելառուսցի սահմանապահները Ուկրաինայի հետ պետական սահմանի պահպանությունն իրականացնում են ուժեղացված տարբերակով։ Այս մասին, БелТА–ի փոխանցմամբ, հայտարարել է Բելառուսի պետական սահմանապահ կոմիտեի պաշտոնական ներկայացուցիչ Անտոն Բիչկովսկին։
«Ուկրաինայի հետ Բելառուսի հանրապետության պետական սահմանի պահպանությունն իրականացվում է սահմանապահ ծառայության և սահմանային վերահսկողության ուժեղացված տարբերակով։ Ուկրաինական ուղղությամբ ավելացվել է սահմանային կարգախմբի թվաքանակն ինչպես կանաչ սահմանին, այնպես էլ անցակետերում»,–նշել է նա։
Բիչկովսկին նշել է, որ անցակետերում սահմանը հատող անձանց ձևակերպումն իրականացվում է ինչպես երկիր մուտք գործելիս, այնպես էլ այն լքելիս` հաշվի առնելով գործող սահմանափակումներն ու անվտանգության լրացուցիչ միջոցները։
Բելառուսի պետական սահմանապահ կոմիտեի պաշտոնական ներկայացուցիչն ընդգծել է, որ տվյալ միջոցառումները ենթադրում են նախևառաջ հանրապետություն մուտք գործող տրանսպորտային միջոցների զննում և հանրապետություն մտնող քաղաքացիների ստուգման խստացում։
Միևնույն ժամանակ, նա ուշադրություն է հրավիրել այն հանգամանքին, որ Բելառուսի սահմանապահ ծառայությունը անհրաժեշտ ուժեր և միջոցներ ունի պետական սահմանին Բելառուսի հանրապետության ազգային շահերն ապահովելու համար։
Նշենք, որ Բելառուսի նախագահ Ալեքսանդր Լուկաշենկոն նախօրեին սահմանապահ զորքերին հանձնարարել էր ամբողջությամբ փակել Ուկրաինայի հետ սահմանը։ Նա նաև նշել էր, որ ներկա պահին «քնած» ահաբեկչական խմբավորումներ` այսպես կոչված ինքնապաշտպանական ջոկատներ են բացահայտվել։
