ԵՐԵՎԱՆ, 2 հուլիսի– Sputnik. «Զարթոնք» ազգային քրիստոնեական կուսակցությունն այսօր, ժամը 15:20-ին Սահմանադրական դատարանին է հանձնել ընտրության արդյունքները վիճարկելու վերաբերյալ դիմումը: Տեղեկությունը Facebook–ի իր էջում հայտնել է «Զարթոնքի» ղեկավար, ՀՀ փաստաբանների պալատի նախագահ Արա Զոհրաբյանը։
Դիմումի համաձայն` խախտվել են ՀՀ Սահմանադրությամբ ամրագրված ընտրական իրավունքի հիմնական սկզբունքները՝ ազատությունը և հավասարությունը:
«Ատելության խոսք, բռնության կոչեր, վարչական ռեսուրսի կիրառում և այլ խախտումներ են եղել, որոնք ազդել են ընտրության արդյունքների վրա»,–գրել է Զոհրաբյանը:
Նա տեղեկացրել է, որ ՍԴ-ին 5 միջնորդություն է ներկայացվել պետական մարմիններից որոշակի տեղեկություններ պահանջելու համար.
- ԱԱԾ-ին՝ ներկայացնել այն քաղաքացիների քանակը, որոնք ընտրության օրը ստորագրել են ցուցակներում, սակայն ըստ ԱԱԾ տվյալների փաստացի Հայաստանի Հանրապետությունում չեն գտնվել։
- ՀՀ ՊԵԿ-ին և ՀՀ վարչապետի աշխատակազմին՝ ներկայացնել հանրային ծառայության մեջ գտնվող անձանց ընդհանուր քանակը։
- ՀՀ ՊՆ-ին՝ ներկայացնել տեղեկություն, թե որքան զինծառայող է մասնակցել 2021թ. հունիսի 20-ի ընտրություններին։
- Տարածքային կառավարման և ենթակառուցվածքների նախարարությանը՝ ներկայացնել տեղեկություն, թե 2021թ. հունիսի 20-ին որ ընտրական տեղամասերն են հոսանքազրկվել, որքան ժամանակով և ինչ պատճառներով։
- Գլխավոր դատախազությանը՝ ներկայացնել տեղեկություն, թե 2021թ. մայիսի 25-ից առ 22.06.2021 թվականն ընտրական բնույթի հանցագործությունների վերաբերյալ քանի հաղորդում է ստացվել իրավապահ մարմինների կողմից, ինչպես նաև այդ հաղորդումներից յուրաքանչյուրի բովանդակությանը համարժեք ինչ միջոցներ են ձեռնարկվել, քանի քրեական գործ է հարուցվել, որ հոդվածի հատկանիշներով:
«Հայաստան» դաշինքը միջնորդել է, որ Վահե Գրիգորյանն իրենց գործի քննությանը չմասնակցի
Հիշեցնենք, որ հունիսի 20–ին կայացած ԱԺ արտահերթ ընտրությունների արդյունքների վիճարկման համար Սահմանադրական դատարան են դիմել «Հայաստան» դաշինքը, «Զարթոնք» ազգային քրիստոնեական կուսակցությունը։ ՍԴ դիմելու մասին հայտարարել է նաև «Պատիվ ունեմ» դաշինքը։
109 տեղամաս, 88 000 ընտրողի ձայն. «Հայաստան» դաշինքը ներկայացրել է ՍԴ-ի հայցի մանրամասները
Խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
