Մի քանի ամսից Երևանի տրանսպորտային համակարգն անցում կկատարի էլեկտրոնային վճարման համակարգի, որի շնորհիվ կկիրառվեն նորագույն տեխնոլոգիական հնարավորությունները: Տեղեկությունը Facebook–ի իր էջում հայտնել է Երևանի քաղաքապետ Հայկ Մարությանը և տեսանյութ հրապարակել, որտեղ նաև ինքն է օգտվում Երևանի նոր տիպի երթուղիներից։
Նա նաև տեղեկացրել է, որ այսօրվանից նոր շարժակազմով երթուղի է դուրս եկել 97 համարի ավտոբուսը (նախկին 37 համարը):
«Սրանով մենք ամբողջացրեցինք 100 նոր կոմպակտ դասի ավտոբուսների շահագործումը: Դրանցով շահագործվող 9 երթուղիները նկատելիորեն թեթևացրել են քաղաքի տրանսպորտի խնդիրը, բացի այդ հնարավորություն են տալիս հընթացս վերհանել և գույքագրել համակարգում եղած խնդիրները՝ տրանսպորտային ռեֆորմի հաջորդ փուլերում դրանք լուծելու համար»,–գրել է Մարությանը:
Նա նաև տեղեկացրել է, որ մի քանի ամսից Երևանում կլինեն 211 միջին տեղատարողության ավտոբուսները:
«Կային գծեր, որոնք 1-2 տարի չէին սպասարկում, քանի որ տնտեսվարողը հրաժարվել էր սպասարկելուց` ասելով, որ եկամտաբեր չէ։ Եվ քաղաքապետարանն այդ գծերի սպասարկումը վերցրել է իր վրա»,–ասաց քաղաքապետը։
Այս ավտոբուսներում պետք է վճարել նստելիս՝ 100 դրամանոց մետաղադրամներով:
