ԵՐԵՎԱՆ, 2 հուլիսի – Sputnik. Ընդդիմությունը պետք է արթնացնի հասարակական միտքը և առաջարկի երկրի զարգացման մոդելներ։ Sputnik Արմենիայի մամուլի կենտրոնում կազմակերպված ասուլիսի ժամանակ այս մասին ասաց ցանցային հետազոտությունների ինստիտուտի վերլուծաբան Արեն Վարդապետյանը։
«Մեզ առկա իրավիճակում անհրաժեշտ է ճգնաժամային իրավիճակների մենեջեր, որն ի զորու կլինի լուծել ծառացած խնդիրները։ Իշխանությունը պաշտոնապես վերարտադրվել է զգալի ցուցանիշներով, և մենք ապագայում նույնպես կունենանք կորուստներ»,– ասաց Վարդապետյանը։
Նրա խոսքով` պատահական չէ, որ ՀՀ վարչապետի պաշտոնակատար Նիկոլ Փաշինյանը հայտարարեց, որ հպարտանում է պարտությամբ, այսինքն` Հայաստանն, ըստ նրա, պատրաստակամ է այսուհետ նույնպես գնալ այդ ճանապարհով։
Վերլուծաբանը կարծում է, որ ստեղծված իրավիճակում փոփոխություն հնարավոր է միայն այն դեպքում, եթե արմատական ընդդիմությունը խորհրդարանում կարողանա արթնացնել հասարակական միտքն ու առաջարկի երկրի զարգացման մոդելներ։
«Անհրաժեշտ է բարձրացնել մարդկանց կրթական մակարդակը, այդ թվում` քաղաքական իրավագիտակցության աստիճանը։ Եթե դա ստացվի, ապա Հայաստանը կունենա արժանապատիվ ապագա»,– նշեց Վարդապետյանը։
Նույն ինստիտուտի տնօրեն Գագիկ Հարությունյանի համոզմամբ`Հայաստանը պետք է ուժեղացնի իր սեփական անկախ գիտակրթական համակարգը։ Այդ համատեքսում նախընտրելի է համահայկական առցանց համալսարանի ստեղծումը։ Նրա համոզմամբ` քանի դեռ չի կազմավորվել ազգային էլիտան, ոչինչ չի ստացվի։ Հենց այդ էլիտան պետք է առաջնորդի ժողովրդին, որպեսզի ամեն ինչ կախված չլինի մեկ մարդուց։
«Հայկական քաղաքակրթության գոյությունն այսօր վտանգված է, հետևաբար այս իրավիճակից դուրս գալու համար առաջնահերթ պետք է պահպանել ազգային գիտակրթական համակարգը և քաղաքակրթական ինքնությունը»,– ասաց Հարությունյանը։
Նա վկայակոչեց այն փաստը, որ, օրինակ, ԱՄՆ–ում կան մոտ 2000 «ուղեղային կենտրոններ», որոնք մշակում են պետության գաղափարախոսությունը, զարգացման ռազմավարությունն ու հիմնական գերակայությունները։ Անդրադառնալով ՀՀ–ում կայացած արտահերթ խորհրդարանական ընտրություններին` Հարությունյանն ընդգծեց, որ գործընթացն ուղղորդվել է այն ուժային կենտրոնների կողմից, որոնք Երևանում որպես կառավարիչ նշանակել են «իրենց մարդուն»։
Ցանցային հետազոտությունների ինստիտուտի տնօրենի հավաստսմամբ` ընտրություններում հաղթանակի հասնելու համար օգտագործվել են տարբեր տեխնոլոգիաներ և պատահական չէ այն հանգամանքը, որ սոցհարցումների համաձայն` բոլոր քաղաքական ուժերի ցուցանիշները ճիշտ էին, բացի «Քաղաքացիական պայմանագրի» ցուցանիշներից։ Նրա կարծիքով`ընտրությունների արդյունքները վկայում են հասարակության, ընտրազանգվածի բարոյահոգեբանական ու մտավոր անկման մասին։
Հիշեցնենք, որ հունիսի 20–ին Հայաստանում կայացան արտահերթ խորհրդարանական ընտրություններ։ Ընտրողների ցուցակներում ընդգրկված 2 593 572 քաղաքացուց ընտրությանը մասնակցեցին 1 281 174–ը կամ 49.4 տոկոսը։
Խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.91%) ու «Հայաստան» դաշինքը (21.09%)։
«Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
Պետք է կարգի գցել այս մեքենան․ Ռոբերտ Քոչարյանը՝ ճգնաժամի, պատերազմի և անելիքների մասին
