ԵՐԵՎԱՆ, 1 հուլիսի – Sputnik. Կառավարությունը մտադիր է մարզպետների կուրացիան վերցնել տարածքային կառավարման նախարարից և տալ փոխվարչապետներից մեկին` նրան, ում կպատվիրակի վարչապետը։ Այդ փոփոխությունից հետո մարզպետի ինստիտուտը հաշվետու կլինի փոխվարչապետին։ Այս մասին գրում է «Հրապարակ» թերթն իր այսօրվա համարում։
«Ժամանակին ընդդիմադիր Նիկոլ Փաշինյանը Սերժ Սարգսյանի «բմբուլները քամուն էր տալիս»՝ իր «հագով» Սահմանադրություն և օրենքներ «կարելու» համար, հիմա ինքն է զբաղված նույն գործով»,–գրում է թերթը։
Թերթին հայտնի է դարձել, որ նախագծում երկար-բարակ ներկայացրել են գործառույթները, ապա հիմնավորել․ «Նշված փոփոխությունների արդյունքում կբարձրացվի մարզպետների հաշվետվողականությունը և վերջիններիս աշխատակազմերի գործունեության արդյունավետությունը»:
«Բայց իրականում պարզ է, որ Նիկոլ Փաշինյանն այս փոփոխությունն իրականացնում է կոնկրետ պաշտոնյայի համար»,–գրում է թերթը:
Եղած տեղեկությունը վերլուծելով` «Հրապարակը» եզրակացնում է, որ տարածքային կառավարման նախարար Սուրեն Պապիկյանի՝ ԱԺ նախագահ դառնալու հարցը փակ է, և նա կդառնա փոխվարչապետ, իսկ մինչ պաշտոնին նշանակվելը, նախարարի նախկին գործառույթներն իր հետ կտեղափոխի փոխվարչապետի գործառույթների տիրույթ։
«Հավանաբար, Պապիկյանն արդեն մարզպետների հետ լեզու է գտել, դրա համար էլ օրենքը փոխում են, որ մեկ ուրիշը նոր տողից չսկսի աշխատանքը»,-գրում է թերթը։
Նյութն ամբողջությամբ կարդացեք թերթի այսօրվա համարում։
«Կունենանք երկարությամբ նախադեպը չունեցող 2 թունել, Իրան դուրս կգանք». Պապիկյան
Հիշեցնենք, որ օրեր առաջ մամուլը գրեց, որ «Քաղաքացիական պայմանագիր» կուսակցությունում անհամբեր սպասում են վարչության առաջիկա նիստին, որի ընթացքում կորոշվի, թե ինչպես են բաշխվելու առաջիկա պաշտոնները։
Վարչության անդամների ձայներով կորոշվի, թե ով է ընդունելի թիմի համար հատկապես ԱԺ ղեկավար պաշտոններում։ Գրում էին, որ թեկնածուները երեքն են․տարածքային կառավարման նախարար Սուրեն Պապիկյանը, գործող նախագահ Արարատ Միրզոյանը և փոխխոսնակ Ալեն Սիմոնյանը։
