ԵՐԵՎԱՆ, 1 հուլիսի – Sputnik. Հայաստանում գրանցված սիբիրյան խոցի վարակի 3 հաստատված դեպքերը հիվանդության մաշկային ձևն են։ Տեղեկությունն այսօր կառավարության նիստի ավարտին, լրագրողների հետ ճեպազրույցում հայտնեց ՀՀ առողջապահության նախարարի պաշտոնակատար Անահիտ Ավանեսյանը։
1 հուլիսի 2021, 11:06
«Վարակվածների առողջական վիճակը միջին ծանրության և թեթև է։ Անհրաժեշտ բժշկական օգնությունը ստանում են, բժիշկներն ամեն ինչ անում են, և բուժման կուրսը նրանց ամբողջովին կտրամադրվի»,– ասաց Ավանեսյանը։
Նա նաև հայտնեց, որ վարակվածների թիվը չի ավելացել, բայց վարակի տարածման աղբյուրն այս պահին դեռևս հայտնի չէ։
Հիշեցնենք` օրեր առաջ Գեղարքունիքի մարզի Վանևան և Տորֆավան համայնքների 3 բնակչի մոտ սիբիրյան խոց էր ախտորոշվել։ Նախնական կասկածներով վարակը տարածվել է հիվանդ անասունի մսից։
