ԵՐԵՎԱՆ, 1 հուլիսի – Sputnik. Եվրամիության երկրների խորհուրդը պաշտոնապես առաջարկել է հանել մի շարք երկրների վրա տարածվող սահմանափակումները, որոնք վերաբերում էին ոչ պարտադիր ուղևորություններին։ Տեղեկությունը հայտնում է ՌԻԱ Նովոստին` հղում անելով ԵՄ խորհրդի հաղորդագրությանը։
Գործակալության աղբյուրն ասել է, որ Եվրամիությանն առընթեր ԵՄ երկրների մշտական ներկայացուցիչներն ընդունել էին այդ որոշումը, և ԵՄ խորհուրդը պետք է վերջնական հավանություն տար: Խոսքը երրորդ երկրների մշտապես շտկվող ցուցակի մասին է, որոնց հետ ԵՄ պետություններին առաջարկվում է բացել արտաքին սահմանները՝ կորոնավիրուսի տարածման համաճարակաբանական իրավիճակի բարելավման հիմքով:
«Խորհուրդը թարմացրել է այն երկրների, հատուկ վարչական շրջանների և այլ կազմավորումների ու տարածքային իշխանությունների ցանկը, որոնց համար պետք է հանել ուղևորությունների սահմանափակումները», - ասված է փաստաթղթում:
Թարմացված ցուցակը գործում է հուլիսի 1-ից։ Ցանկում ավելացվել են Հայաստանը, Ադրբեջանը, Բոսնիա և Հերցեգովինան, Բրունեյը, Կանադան, Հորդանանը, Մոնտենեգրոն, Կատարը, Մոլդովան, Սաուդյան Արաբիան։
Նախկին ցուցակից ոչ մի երկիր չի հանվել։ Բացի ավելացված պետություններից և կազմավորումներից, ցուցակում ընդգրկված են նաև Ալբանիան, Ավստրալիան, Չինաստանը, Իսրայելը, Ճապոնիան, Լիբանանը, Նոր Զելանդիան, Հյուսիսային Մակեդոնիան, Ռուանդան, Սերբիան, Սինգապուրը, Հարավային Կորեան, Թաիլանդը, ԱՄՆ-ն, Թայվանը՝ սահմանների բացման հարցում փոխադարձության հաստատման պայմանով։ Ռուսաստանն այդ ցանկում առաջվա պես չկա։ Ցուցակը կվերանայվի երկու շաբաթ անց։
Եվրամիությունը մայիսի 20-ին պաշտոնապես հրապարակել էր երրորդ երկրներից ուղևորությունների սահմանափակումների վերացման չափորոշիչների փոփոխման մասին որոշումը՝ էապես թուլացնելով դրանք: Այս կանոններին համապատասխան ԵՄ-ում կազմում են երրորդ երկրների ցանկը, որոնց հետ խորհուրդ է տրվում բացել սահմանները։ Այս պահին այդ ցուցակում հայտնվելու համար կորոնավիրուսով հիվանդության նոր դեպքերի թիվը 100 հազար մարդու հաշվարկով վերջին երկու շաբաթվա ընթացքում չպետք է գերազանցի 75-ը։
Նախկինում գործող կանոնները սահմանափակում էին այդ ցուցանիշը 100 հազար բնակչի հաշվով առավելագույնը 25 դեպքով։ Ցուցակը կազմելիս այսուհետ հաշվի կառնվի նաև երկրում բնակչության պատվաստման գործընթացը. նախկինում այդ ցուցանիշը բացակայում էր կանոններում։
