ԵՐԵՎԱՆ, 1 հուլիսի – Sputnik. ՀՀ Էկոնոմիկայի նախարարի պաշտոնակատար Վահան Քերոբյանն այսօր կառավարության նիստի ավարտին լրագրողների հետ զրույցում անդրադարձավ Հայաստանում արձանագրված ոռոգման ջրի խնդրին։
«Այս տարվա հունիսը ռեկորդային շոգ է եղել ՀՀ–ի ամբողջ պատմության ընթացքում, և ոչ թե կես աստիճանով, այլ 3 աստիճանով է նորմայից շոգ եղել։ Դրա պատճառով առաջացել է այսպիսի աննախադեպ դժվար իրավիճակ։ Ամբողջ խնդիրն առաջացել է նրա պատճառով, որ անջրդի հողատարածքներում ջրելու կարիք է առաջացել, քանի որ շոգը վտանգել է անջրդի հողատարածությունների բերքը»,– մեկնաբանեց Քերոբյանը։
Խնդիրը, նրա խոսքով, համակարգային լուծում է պահանջում, և կառավարությունը 2 օր առաջ մեկնարկել է այդ գործընթացը։
«Կլիմայի փոփոխությունն անշրջելի է։ Եվ, եթե մենք այսօր ասում ենք` շոգ է, ոչ մի երաշխիք չկա, որ հաջորդ տարի էլ ավելի շոգ չի լինելու»,– ասաց նա։
Ի՞նչ է կատարվում ոռոգման ջրի համակարգում. ֆինանսավորումն ավելացել է, պարտքերը` շատացել
Քերոբյանը վստահեցրեց` Հայաստանն ունի պոտենցիալ` կլիմայի տաքացմանը դիմակայելու, պարզապես պետք է այն ճիշտ օգտագործվի։
Իսկ այսօր առաջացած խնդիրը լուծելու համար էկոնոմիկայի նախարարը չբացառեց, որ կառավարությունն առաջիկայում կդիտարկի Սևանից լրացուցիչ ջրառ իրականացնելու ու գյուղացիներին կրած վնասների դիմաց փոխհատուցելու հնարավորությունը։
Ջրի սով` հարուստ պաշարներով երկրում. ի՞նչ կլինի, եթե ադրբեջանցիները փոխեն Թարթառի հունը
Նշենք, որ հունիսի 26–ին Արմավիրի մարզի 13 գյուղերի բնակիչներ փակել են Արմավիր-Երևան մայրուղին և պահանջում են լուծել ոռոգման ջրի խնդիրը: Նրանց խոսքով` մեկ շաբաթ է, ինչ ոռոգման ջուր չկա իրենց համայնքներում:
