ԵՐԵՎԱՆ, 1 հուլիսի – Sputnik. ՀՀ Վարչապետի պաշտոնակատար Նիկոլ Փաշինյանն այսօր վարչապետի աշխատակազմին է ներկայացրել աշխատակազմի նորանշանակ ղեկավար Արայիկ Հարությունյանին: Տեղեկությունը հայտնում են ՀՀ կառավարության ամմուլի ծառայությունից։
Նիկոլ Փաշինյանը շնորհակալություն է հայտնել Արսեն Թորոսյանին աշխատակազմի ղեկավարի պաշտոնում կատարած աշխատանքի համար՝ նշելով, որ չափազանց բարդ այս ժամանակաշրջանում նա պատվով կատարեց իր առջև դրված խնդիրը:
«Մեր քաղաքական քննարկումների արդյունքում, այդ թվում պարոն Թորոսյանի ցանկությունները հաշվի առնելով, մենք որոշել ենք, որ նա իր հետագա գործունեությունը կշարունակի Ազգային ժողովում՝ օրենսդիր մարմնում»,–ասաց Փաշինյանը:
Նիկոլ Փաշինյանն անդրադարձել է արտահերթ խորհրդարանական ընտրություններից հետո ձևավորված իրավիճակին և խոսել նոր ժամանակաշրջանի կարևոր առանձնահատկության մասին։
«Մենք ունենք քաղաքական ծրագիր և բովանդակություն, որը ձևակերպված է «Քաղաքացիական պայմանագիր» կուսակցության նախընտրական ծրագրում: ՀՀ քաղաքացիներն այդ ծրագրի իրագործման համար տվել են քվե, տվել են մանդատ, տվել են Կառավարություն և Ազգային ժողով ձևավորելու լիազորություն: Եվ եթե մենք 2018 թվականին այդպիսի շեշտադրում չենք արել՝ ելնելով իրադրության առանձնահատկություններից, ես ուզում եմ ասել, որ կառավարման ամբողջ համակարգի նպատակը շատ հստակ է՝ իրագործել առաջիկա 5 տարիների ընթացքում այն, ինչ գրված է ՔՊ–ի նախընտրական ծրագրում, որը հաստատված է ՀՀ քաղաքացու քվեով: Եվ, հետևաբար, պետական կառավարման համակարգում պետք է աշխատեն մարդիկ, ովքեր հավատում են այդ ծրագրին, ովքեր այդ ծրագիրը համարում են իրենց աշխատանքային ուղեցույցը, և սա կարևոր նախապայման է»,–ասել է վարչապետի պաշտոնակատարը:
Նա հավելել է, որ ովքեր չեն հավատում, չեն ընդունում, վերապահումներ ունեն, իրենք դրան նորմալ են վերաբերվում, հետևաբար, նրանց իրենք հաջողություն են մաղթում իրենց հետագա գործունեության մեջ:
Փաշինյանը ընդգծել է, որ կառավարման որակի բարձրացումը պետք է իրենց առաջնահերթություններից լինի: «Երբեք չի լինելու այնպիսի համակարգ, որտեղ անձինք, անհատներն առանցքային նշանակություն չունենան: Դա միշտ էլ այդպես է լինելու, և հետևաբար, կառավարման արդյունավետության բարձրացումը մենք պետք է սկսենք վարչապետի աշխատակազմից», - ասել է վարչապետի պաշտոնակատարը:
Արսեն Թորոսյանը շնորհակալություն է հայտնել Նիկոլ Փաշինյանին՝ իրեն այդ պատասխանատու առաքելությունը վստահելու համար, ինչպես նաև այն չշարունակելու և գործունեությունն Ազգային ժողով տեղափոխելու իր դիմումը չմերժելու համար:
Իր հերթին Արայիկ Հարությունյանը ևս շնորհակալություն է հայտնել Նիկոլ Փաշինյանին՝ վստահության համար և Արսեն Թորոսյանին՝ կատարած աշխատանքի համար:
Հեղափոխության թավիշն ու խոստացված պատիժը. 7-րդ գումարման խորհրդարանի աղմկոտ օրինագծերը
«Մենք քաղաքական նոր փուլ ենք մտնում, քաղաքացին նոր որակի մանդատ է տվել, և աշխատակազմը, նախարարությունները պետք է դիրքավորվեն ըստ այդ նոր մանդատի և այն ծրագրի, որը հաստատվել է քվեարկությամբ», - ասել է վարչապետի աշխատակազմի նորանշանակ ղեկավարը:
Նիկոլ Փաշինյանն ընդգծել է, որ առաջիկա փուլը ևս բարդ է լինելու, պարզապես ամեն փուլ ունի իր բարդության առանձնահատկությունները: Վարչապետի պաշտոնակատարի խոսքով՝ պետք է կարողանալ հասկանալ, թե ինչ է մեզ հետ տեղի ունեցել և ինչ է տեղի ունենում, որովհետև այս ճիշտ ախտորոշման պարագայում կկարողանանք կանխատեսել, թե ինչ է տեղի ունենալու և կառավարել դրանք:
Ռոբերտ Քոչարյանը մեկուկես տարուց նոր խորհրդարանական ընտրություններ է կանխատեսում
Հիշեցնենք, որ Նիկոլ Փաշինյանի հրամանով այսօր Արսեն Թորոսյանն ազատվել է վարչապետի պաշտոնակատարի պաշտոնից, նրա փոխարեն նշանակվել է Փաշինյանի արդեն նախկին գլխվոր խորհրդական Արայիկ Հարությունյանը։
