ԵՐԵՎԱՆ, 30 հունիսի – Sputnik. ՀՀ Հաշվեքննիչ պալատի նախագահ Լևոն Յոլյանն այսօր ԱԺ–ում ՀՊ–ի տարեկան հաշվետվությունը ներկայացնելիս, անդրադարձավ պալատի կատարած առավել հետաքրքիր բացահայտումների։
Խոսելով վերջին շրջանում թեժ քննարկումների առիթ դարձած ոռոգման համակարգի խնդիրներին, Յոլյանը մասնավորապես շեշտեց, որ 2019թ–ից ի վեր այս համակարգի պետական հատկացումներն աննախադեպ ավելացել են, բայց միաժամանակ ավելացել են նաև պարտքերը։
Այսպես` 2019թ–ի պետական բյուջեով ՋՕԸ–երին հատկացվել է 7.4 մլրդ դրամի պետական աջակցություն, սակայն իրականում տրվել է կրկնակի ավելի` 14.7 մլրդ դրամ։ Համեմատության համար Յոլյանն ասաց, որ 2017–ին այդ հատկացումը կազմել է 5.2, 2018թ–ին` 5.5 մլրդ դրամ։
Հաշվեքննիչ պալատը պարզել է, որ պետության տրամադրած սուբսիդիան ՋՕԸ–երն ուղղել են իրենց նախորդ տարիներին կուտակած պարտքերի մարմանը, ինչի իրավունքն, ի դեպ, չունեին։
Կաթիլային ոռոգման համակարգը հնարավոր կլինի կիրառել միայն նոր տնկվող այգիներում. Պետրոսյան
ՋՕԸ–երի պարտքերը 2018–ի վերջում կազմում էին 9.4 մլրդ դրամ։ Խնդիրը հասկանալու ու լուծելու համար ՀՀ կառավարությունը 2019թ–ին հանձնարարել է մշակել ճանապարհային քարտեզ` կոնկրետ գործողություններով ու ծրագերով։
«Սակայն հանձնարարականը չի կատարվել։ Եվ փոխարենը, առանց կուտակված պարտքերի հիմնավորվածությունն ու գոյացման պատճառներն ուսումնասիրելու, 2019թ–ին պետական բյուջեից ՋՕԸ–երին հատկացվել են իրենց մեծությամբ նախադեպը չունեցող ֆինանսական միջոցներ։ Ավելին` տարեվերջին ՋՕԸ–երի մոտ կուտակվել է շուրջ 2 մլրդ դրամի կրեդիտորական պարտքեր»,– ասաց Յոլյանը։
ՋՕԸ–երի գործունեությունը համակարգող ՀՀ Ջրային կոմիտեն, ՀՊ–ի դիտարկմամբ, 2019թ–ին այդպես էլ չի անդրադարձել պարտքերի խնդրին, դրանց պատճառներին, ու ոչ մի քայլ չի ձեռնարկել այդ ուղղությամբ։
Հիշեցնենք` արդեն մի քանի օր է` ՀՀ տարբեր մարզերի ու տարբեր համայնքների բնակիչներ դժգոհում են ոռոգման ջուր չունենալուց ու բողոքի ակցիաներ կազմակերպում` հայտարարելով, որ իրենց բերքը փչանում է։
Հունիսի 29-ին ՀՀ վարչապետի պաշտոնակատար Նիկոլ Փաշինյանը խորհրդակցություն էր հրավիրել, որի ընթացքում քննարկվել էին ոռոգման ոլորտում առկա խնդիրների լուծման ուղիները:
Փաշինյանը կարևորել էր ոռոգման կաթիլային համակարգին անցնելու ու մեկ տասնյակից ավելի ջրամբարների շինարարությունն անհետաձգելիորեն իրականացնելու անհրաժեշտությունը։
«Մեր սիրելի վարչապետն եկավ, ասաց` ջրային խնդիր չի լինի, գնաց, ջուրը վաբշե կտրին». գյուղացի
