ԵՐԵՎԱՆ, 30 հունիսի - Sputnik. Արցախի Հանրապետության ազգային անվտանգության ծառայությունը, հաշվի առնելով վերջին օրերին Ադրբեջանի կողմից Արցախի Հանրապետության քաղաքացիների շրջանում հեռախոսազանգերի, սոցիալական ցանցերում հրապարակումների միջոցով խուճապ տարածելու և վախի մթնոլորտ ստեղծելու փորձերը, տեղեկացնում է, որ դա ադրբեջանական հատուկ ծառայությունների կողմից մշակված քարոզչություն է։
Արցախի ՄԻՊ–ն ահազանգում է` Facebook-ում ակտիվացել է «Խանքենդի/Ստեփանակերտ» էջը
Մասնավորապես՝ ս.թ. հունիսի 29-ին «Xankəndi / Khankendi / Խանքենդի ֆեյսբուքյան էջում տեղադրվել է հայտարարություն, որով Արցախի Հանրապետության բնակչությանը կոչ է արվում «WhatsApp» բջջային հավելվածով իրենց նշված հեռախոսահամարին հարցեր ուղարկել։
«Նշված հանգամանքը մեկ անգամ ևս վկայում է, որ ադրբեջանական կողմը փորձում է կեղծ ու էժանագին քարոզչության միջոցով խուճապ առաջացնել հայ հասարակության շրջանում»,-նշված է հաղորդագրության մեջ:
Արցախի Հանրապետության ազգային անվտանգության ծառայությունը կոչ է անում չտրվել ադրբեջանական քարոզչությանը, սոցիալական ցանցերում լինել զգոն և զերծ մնալ նման քարոզչական բնույթի նյութերի տարածելուց ու քննարկելուց, իսկ նման իրադրության մեջ հայտնված անձանց, իրենց իսկ շահերից ելնելով, խնդրում ենք անհապաղ դիմել ԱՀ ԱԱԾ։
Հիշեցնենք` օրեր առաջ Արցախի ԱԱԾ–ն հաստատել էր, որ եղել են դեպքեր, երբ Ադրբեջանի ու Թուրքիայի քաղաքացիներն Արցախի քաղաքացիներին են զանգահարել։ ԱԱԾ–ն կոչ էր անում նման բնույթի զանգեր ստանալու դեպքում անհապաղ դիմել իրենց։
Արցախում ռուս սակրավորները շարունակում են վտանգավոր իրերի ոչնչացումը
