ԵՐԵՎԱՆ, 29 հունիսի – Sputnik. Շիրակի մարզի «Արփի լիճ» ազգային պարկում ծառագողության դեպքերն արձանագրվել են, բայց այնպես, որ հանցագործները պատասխանատվության չենթարկվեն։
Նման բացահայտում է արել ՀՀ գլխավոր դատախազությունը` ուսումնասիրելով ոստիկանության Շիրակի մարզային վարչության Աշոցքի բաժնում 2021 թվականի առաջին կիսամյակի ընթացքում Արփի լճի տարածքում ապօրինի ծառահատումների վերաբերյալ կազմված նյութերը։
Պարզվել է, որ ազգային պարկն ու ոստիկանությունը ծառահատումների դեպքերն արձանագրել են, բայց այնպես, որ դրանց հիման վրա գործեր չհարուցվեն։ Բանն այն է, որ հատված ծառերն արձանագրվել են հատ–հատ, կամ լավագույն դեպքում` մեկ–երկու հատով։ Արդյունքում` յուրաքանչյուր դեպքով պատճառված վնասը չի հասել քրեական օրենսգրքով նախատեսված նվազագույն չափին և քրեական գործի հարուցումն այս հիմքով մերժվել է։ Ծառագողերը մնացել են անպատիժ, Արփի լճում ապօրինի ծառահատումներն էլ շարունակվել են։
Կատարած բացահայտման արդյունքում Շիրակի մարզի դատախազը միջնորդագրեր է ներկայացրել ՀՀ շրջակա միջավայրի նախարարին, ՀՀ բնապահպանության և ընդերքի տեսչական մարմնի ղեկավարին, ՀՀ ոստիկանության Շիրակի մարզային վարչության պետին` ծառագողությունը կանխելու ու բացահայտելու համար «Արփի լիճ» ազգային պարկի տարածքում շուրջօրյա վերակարգեր սահմանելու, մուտքի – ելքի հսկողությունն ուժեղացնելու, պարկի տարածքում ուսումնասիրություն իրականացնելու վերաբերյալ։
Մեկուկես ժամում Լոռու մարզում հայտնաբերվել է փայտանյութով բեռնված 19 մեքենա
Դատախազը հանձնարարաել է նաև կոպիտ խախտումներ թույլ տված անձանց նկատմամբ կարգապահական և այլ բնույթի պատասխանատվության միջոցներ ձեռնարկել։
