ԵՐԵՎԱՆ, 29 հունիսի – Sputnik. Հայ ծրագրավորողները կարող են լավ գործընկերներ դառնալ գլխուղեղի սքանավորման նախագծերում։ Այս մասին Sputnik Արմենիայի հետ զրույցում հայտարարեց Quantitative Medical Imaging Systems Group ընկերութւյան տնօրեն Համիդրեզա Սալիգե Ռադը, որը Երևան է ժամանել հայ–իրանական բիզնես–համաժողովին մասնակցելու համար։
Միաժամանակ Սալիգե Ռադը Թեհրանի բժշկական գիտությունների համալսարանում գիտական խումբ է ղեկավարում։ Նրա ուսումնասիրությունները նվիրված են հիմնականում գլխուղեղի սքանավորման նոր տեխնոլոգիաներին, մասնավորապես Ալցհեյմերի հիվանդության և տարբեր ուռուցքների դեպքում։ Աշխատանք է տարվում ծրագրային ապահովման ուղղությամբ, քանի որ Իրանում սքաներներ դեռ չեն արտադրում։
«Մենք նյարդավիրաբույժներին փորձում ենք տալ ուռուցքի առավելագույնս հստակ եզրագծեր, որպեսզի նա ստիպված չլինի հեռացնել ուղեղի առողջ հյուսվածքները կամ վնասի դիմային նյարդերը։ Օրինակ, մի շարք ուռուցքների հեռացումը բավականին հաջող է իրականացվում, բայց միևնույն ժամանակ կարող են վնասվել նյարդերը։ Դրանից կարելի է խուսափել», – հավելեց նա։
«Ալցհեյմերի հիվանդության դեպքում մեր սոֆթը միլիմետրի ճշգրտությամբ է աշխատում, քաղցկեղի դեպքում ամեն ինչ կախված է ՄՌՏ–սքաների հզորությունից (նրա մագնիսական դաշտի ինդուկցիայից)։ Եթե այն գերազանցում է 3 տեսլան, կարելի է ճշգրտության հասնել 2 մմ սահմաններում»,-ասաց նա։
Ցավոք, պատկերի կետայնությունը բարձրացնել դժվար է, հատկապես հաշվի առնելով, որ Արևմուտքի երկրները սահմանափակում են Իրանի հետ համագործակցությունը նաև առողջապահության ոլորտում, իսկ պատրաստի տեխնոլոգիաներ գնելը հեշտ գործ չէ. Siemens–ը կամ Philips–ը, առավել ևս ամերիկյան General Electric ընկերությունը դրանք Իրանին չեն վաճառում։ Նույնիսկ արևմտայն համալսարաններում գրեթե փակվել են Իրանի հետ համագործակցության ծրագրերը, նշեց Սալիգե Ռադը (ժամանակին նա post-doc ծրագրերով ուսանել է ԱՄՆ միանգամից երկու բուհերում` Հարվարդում և Փենսիլվանիայի համալսարանում)։
Ցանկանալով լրացնել այդ բացը, Թեհրանն ամրապնդում է համագործակցությունը Պեկինի հետ։ QMISG–ը համատեղ ձեռնարկություն է ստեղծել ՄՌՏ–սքաներների չինական մշակողներից մեկի հետ, որի համար ալգորիթմներ է կազմում։ Հայ ծրագրավորողների հետ համագործակցությունն այդ աշխատանքում կարող է բավական օգտակար լինել, ընդգծել է Սալիգե Ռադը։
Ինչ կտա Իրանի պատժամիջոցների չեղարկումը ՀՀ-ին. փորձագետը՝ նոր հնարավորությունների մասին
«Ես արդեն այցելել եմ ձեր մի քանի ՏՏ ընկերություններ, այնտեղ լավ մակարդակի մասնագետներ կան։ Նրանք կարող են մեզ հետ միասին հիանալի լուծել այն խնդիրները, որոնք մենք դնում ենք մեր առջև»,– նկատեց նա։
Հավելենք, որ հայկական մի քանի ընկերություն արդեն հետաքրքրություն է հայտնել իրանա–չինական նախագծի նկատմամբ։
