ԵՐԵՎԱՆ, 27 հունիսի – Sputnik. «Հայաստան» դաշինքը դիմելու է ՍԴ` վիճարկելով արտահերթ խորհրդարանական ընտրությունների արդյունքները։ Դաշինքի ներկայացուցիչ Արամ Վարդևանյանն այսօր ԿԸՀ–ում լրագրողների հետ զրույցում մանրամասնել է, թե ինչ են ակնկալում դատական այդ ատյանից։
«ՍԴ–ում ընտրությունների վեճը ոչ թե մաթեմատիկական վեճ է` 100 ձայն` այս կողմ կամ 50 ձայն` այն կողմ, այլ ընտրությունների ամբողջ շղթայի գնահատում` սկսած այն բանից, որ վարչապետի պաշտոնակատարը, փաստացի հրաժարական տալով, մնացել էր իր պաշտոնին, մինչև ատելության խոսք, մինչև հունիսի 20-ին` քվեարկության օրը, ամբողջ Երևան քաղաքում «Հայաստան» դաշինքի վերաբերյալ հատուկ թռուցիկների բաժանելը, որը Երևանի քաղաքապետարանից 4-5 ժամ պահանջեց ամբողջությամբ մաքրելու համար։ Ոստիկանությունից էլ պահանջվեց 1 ժամ` մինչև գոնե մեկ անձի գտնեն, բայց ոչ ոքի չձերբակալեցին»,– ասաց Վարդևանյանը։
Նա շեշտեց, որ բոլոր այս հարցերն ու դրանց վերաբերյալ դատարանների վճիռներով ստացված իրավական գնահատականները ներկայացվելու են ՍԴ ու քննարկման առարկա են դառնալու։
«Նաև դիտարկվելու է, թե մանդատներն ինչպես են վերջնական հաշվարկվելու, ինչպես են բաշխվելու, որովհետև ՍԴ–ն ունի իրավասություն` անվավեր ճանաչելու և մանդատների բաշխման նոր կարգ ճանաչելու»,– ասաց Վարդևանյանը։
Վարդևանյանը նշեց, որ ՍԴ–ից ակնկալում են 3 հնարավոր որոշում.
- Ընտրության արդյունքներն անվավեր ճանաչել,
- Ընտրության արդյունքները անվավեր ճանաչել և նշանակել 2-րդ փուլ,
- Ընտրության արդյունքներն անվավեր ճանաչել և սահմանել մանդատների բաշխման նոր կարգ։
«Հայաստան» դաշինքը ՍԴ կդիմի օրենքով նախատեսված ժամկետում` ընտրության արդյունքների այսօրվա վերջնական ամփոփումից հետո` 5–օրյա ժամկետում։
Կեղծ ահազանգի պատճառով ինձ 1,5 ժամ մեկուսացրել են ընտրական պրոցեսից. Այգեստանի համայնքապետ
Հիշեցնենք` արտահերթ խորհրդարանական ընտրություններին մասնակցում են 21 կուսակցություն և 4 դաշինք։
Կուսակցությունների համար անցողիկ շեմը 5 տոկոս է, դաշինքների համար՝ 7 տոկոս։
Ըստ օրենքի` եթե անցողիկ շեմը հաղթահարում են միայն երկու քաղաքական ուժ, ապա մանդատներ է ստանում նաև առավելագույն թվով ձայներ հավաքած երրորդ ուժը։
Այսօր ԿԸՀ–ն հրապարակեց ընտրությունների վերջնական արդյունքները։ Այսպիսով` 8–րդ գումարման ՀՀ ԱԺ–ում ներկայացված կլինեն «Քաղաքացիական պայմանագիր» կուսակցությունը, «Հայաստան» և «Պատիվ ունեմ» դաշինքները։
