ԵՐԵՎԱՆ, 26 հունիսի – Sputnik. Շիրակի մարզում «թավշյա հեղափոխությունից» հետո երեք մարզպետ է նշանակվել, երեքն էլ չեն շփվել համայնքի ղեկավարների հետ։ «Հայաստան» դաշինքի մամուլի սրահում այս մասին հայտարարել է Շիրակի մարզի Ազատան համայնքի ղեկավար Վարդան Իկիլիկյանը։
Նրա խոսքով`գրեթե այցելություններ չեն եղել, կարեծես՝ իրենք անտեսված են եղել։
«Սպասել են` մինչև մեր լիազորություններն ավարտվի, մեզնից ազատվեն։ Վերջին ընտրություններում, ճիշտ է, մեզ չեն ասել` դիմում գրեք, ի տարբերություն մյուս մարզերի, բայց կա մի խումբ, որ 72 ժամ են տվել մեր համայնքապետներին։ Ասել են, թե պետք է հրաժարական տանք, որ ժողովուրդն է դա պահանջում»,- ասաց նա:
Իկիլիկյանի խոսքով`իրենց ներկայացնում են, որ առաջիկայում ՏԻՄ ընտրություններ են, ավելի լավ կլինի` դիմում գրեն, հրաժարվեն, որ հետագայում ավելի խորը հետապնդումներ չլինեն, ստուգումներ չլինեն։
«Ինքս` որպես համայնքապետ, չեմ փորձում ընդառաջ գնալ նրանց խնդրանք կլինի, հորդոր կլինի, թե ստիպողական ինչ-որ բան կլինի, որովհետև հետպատերազմյան ժամանակաշրջանում ունենք մեր համայնքներում զոհեր, ունենք գերեվարվածներ, որոնց նկատմամբ մենք պարտավորություններ ունենք: Ընտրություններին կմասնակցենք, թե չենք մասնակցի` դա մեր քաղաքական կամքն է, և մենք չենք պատրաստվում նման խմբավորումների հորդորներին ընդառաջ գնալ»,-ասաց նա:
Նշենք, որ այսօր «Հայաստան» դաշինքը ՀՀ գործադիր իշխանությունից պահանջել էր անհապաղ դադարեցնել քաղաքական հայացքներով պայմանավորված հալածանքներն ու բռնությունները, իսկ ժողովրդին կոչ էր արել չլքել հայրենիքը։
Հիշեցնենք, որ դեռ ընտրությունների օրը վարչապետի աշխատակազմի ղեկավար Արսեն Թորոսյանն ակնարկել էր տեղական ինքնակառավարման մարմիններում կադրային զտումների մասին։
Նրա խոսքով՝ բոլոր այն համայնքապետները, քաղաքապետները, որոնք առաջադրվել են ընդդիմադիր ցուցակներով, շուտով հրաժեշտ կտան իրենց պաշտոններին։
Հունիսի 23–ին հայտնի դարձավ, որ Լոռու մարզպետ Արամ Խաչատրյանն ընտրություններից հետո իր մոտ է կանչել Օձուն համայնքի ղեկավար Արսեն Տիտանյանին և պահանջել հրաժարականի դիմում գրել։ Տեղեկությունը ՀՀ ՄԻՊ Արման Թաթոյանին հայտնել էր «Հայաստան» դաշինքի շտաբի ղեկավար Արմեն Գևորգյանը։
Ըստ Արմեն Գևորգյանի` Օձուն համայնքի ղեկավարը հրաժարվել է կատարել Լոռու մարզպետի պահանջը, որից հետո պահանջը չկատարելու համար մարզպետարանի շենքում, 7-8 մարդու ներկայությամբ, նրան ծեծի են ենթարկել:
Համայնքապետներին սպառնում են, ծեծում․ «Հայաստան» դաշինքն ահազանգում է
Լոռու մարզպետարանում Օձունի համայնքապետ Արսեն Տիտանյանին ծեծի ենթարկելու դեպքի առթիվ ՀՀ Լոռու մարզի դատախազությունում հարուցվել է քրեական գործ։
