ԵՐԵՎԱՆ, 24 հունիսի – Sputnik. ՀՀ էկոնոմիկայի նախարարի պաշտոնակատար Վահան Քերոբյանը չի հերքում` Հայաստանում արտագաղթի միտում կա։ Այս մասին նա ասաց այսօր կառավարության նիստի ավարտին, լրագրողների հետ ճեպազրույցում։
«Ես չեմ ժխտում, որ կա այդ միտումը։ Իհարկե, մարդկանց մի մասը հիասթափված է 44-օրյա պատերազմի արդյունքից, միգուցե նաև` կառավարության աշխատանքից։ Իհարկե, մենք պետք է այնպիսի միջավայր ստեղծենք, որպեսզի այդ հիասթափությունը առիթ չդառնա գնալու, այլ վերածվի էներգիայի»,– ասաց նա։
Հարցին, թե հիասթափության նոր առիթ չէր արդյո՞ք արտահերթ խորհրդարանական ընտրությունների արդյունքը, Վահան Քերոբյանը պատասխանեց. «Դա ժողովրդի ընտրությունն էր»։
Ընդ որում, նրա գնահատմամբ, շատ ավելի կարևոր էր ոչ թե ընտրությունների արդյունքը, այլ դրանց անցկացման մակարդակը։ «Մենք բետոնեցինք, ցեմենտեցինք մեր ժողովրդավարական ճանապարհը»,– ասաց նա։
Վերադառնալով արտագաղթի հարցին` նախարարը նշեց, որ իշխանության խնդիրն այսօր հանրության շրջանում առկա մտահոգությունները փարատելն է։
«Մեր խնդիրն այսօր այն է, որ շուտ այդ անհանգստությունները փարատենք, անվտանգային միջավայրը վերականգնենք, ներդրումային միջավայրը վերականգնենք, մեր հասարակության մեջ համերաշխության ու ստեղծագործական մթնոլորտը վերականգնենք»,– ասաց Քերոբյանը։
«Այս պահին աշխատանք չեմ փնտրում». ի՞նչ ծրագրեր ունի Էդմոն Մարուքյանը
Ինչ վերաբերում է 2021թ–ի առաջին 5 ամիսներին գրանցված արտագաղթի ցուցանիշներին, նախարարի համոզմամբ` այդ թիվը ներառում է նաև սեզոնային արտագնա աշխատանքի մեկնածների հաշվարկը, ուստի բացառված չէ, որ մեկնածների մի մասը մինչև տարեվերջ վերադառնան։
ՀՀ–ն չի ֆինանսավորի Թուրքիայի գանձարանը. թուրքական ապրանքների արգելքը երկարաձգվեց 6 ամսով
Հիշեցնենք` 2021թ–ի հունվար– մայիս ամիսներին Հայաստանից մեկնող ու ժամանող ՀՀ քաղաքացիների թվի տարբերությունը, պաշտոնական վիճակագրության համաձայն, կազմել է 88 854 մարդ։
2021թ.- ի հունվար-մարտին, պաշտոնական տվյալներով, ՀՀ-ից մեկնել և չի վերադարձել 63 713 ՀՀ քաղաքացի։ Ապրիլին այս ցուցանիշն ավելացել է ևս 16 827–ով, մայիսին` 8 314–ով:
