Եթե խորհրդարան անցած «Հայաստան» և «Պատիվ ունեմ» դաշինքները որոշեն հրաժարվել մանդատներից, ապա պայքարը պետք է շարունակեն փողոցում` հանրահավաքների, բողոքի ակցիաների տեսքով։ Sputnik Արմենիայի հետ զրույցում նման կարծիք հայտնեց քաղաքագետ Արմեն Բաղդասարյանը։
«Մանդատներից հրաժարվելը չի կարող ինքնանպատակ լինել։ Այնպես չէ, որ նրանք մանդատներից հրաժարվեն ու գնան տուն, եթե փողոց դուրս չգան, ուրեմն տրամաբանական կլինի, որ վերցնեն մանդատները և պայքարը շարունակեն խորհրդարանում»,- ասաց նա։
Բաղդասարյանի կարծիքով` եթե նույնիսկ ընդդիմադիր ուժերը որոշեն գնալ խորհրդարան, ապա նրանց առաջնորդներից գոնե Ռոբերտ Քոչարյանը կհրաժարվի իր մանդատից։ Թե ինչ որոշում կկայացնի Արթուր Վանեցյանը, քաղտեխնոլոգը դժվարանում է պատասխանել։
«Ռոբերտ Քոչարյանի դեպքում գրեթե վստահ եմ, որ չի վերցնի, որովհետև Հայաստանում նախադեպ չկա, երբ երկրի նախկին ղեկավարը խորհրդարանում որպես շարքային պատգամավոր ներկայացված լինի։ Մյուս դաշինքի առաջնորդի դեպքում այլ է, և դաշինքը կորոշի` կգնա, թե ոչ»,- նշեց Բաղդասարյանը։
Ընդդիմադիր ուժերի քայլերն էլ այս պահի դրությամբ տեսանելի չեն, բայց հեռանկարային առումով հասկանալի են` ակնհայտ է, որ գործող իշխանությունն ինչպես նախորդ երեք տարում, այս խորհրդարանում ևս ձախողված ընթացքն ու աշխատաոճը շարունակելու է, ինչից ամենահարմար պահին կօգտվեն ընդդիմադիրները։
Զինվորները քվեարկում են պատրաստի ծրարներով. դատախազությունն ուսումնասիրում է տեսանյութը
«Հայաստանին նույնքան լուրջ, գուցե նույնիսկ ավելի ծանր փորձություններ են սպասվում, և նրանք ըստ երևույթին պետք է փորձեն օգտվել այդ ամենից, խորհրդարանում իրենց ներկայացվածությունից, իրենց ռեսուրսներից և շարունակեն իրենց ազդեցությունը մեծացնել մինչև համարեն, որ իշխանությունը բավականաչափ թուլացել է, որպեսզի փողոցային պայքարի, հանրահավաքային պայքարի միջոցով փորձեն պարտադրել ևս մեկ արտահերթ ընտրություններ»,- ընդգծեց Բաղդասարյանը։
Քաղաքագետի կարծիքով` 8-րդ գումարման ԱԺ-ն փոքր-ինչ ավելի ագրեսիվ ընդդիմություն կունենա, բայց որակապես չի տարբերվի նախորդ խորհրդարանից։ Ինչպես միշտ այս անգամ ևս օրենսդիրը կշարունակի իրականացնել կառավարության որոշումները դակողի պարտականությունները, քանի որ այս անգամ ևս իշխող ուժը մեծամասնություն է կազմում։
«Օրենսդրական դաշտի որևէ լուրջ հարց խորհրդարանում չի քննարկվում և չի որոշվում ընդհանրապես։ Այնտեղ ընդամենը կառավարության կաբինետներում որոշված օրենքներն ու նախագծերը բերվում և դակվում են, և դա շարունակելու է այդպես մնալ»,- հավելեց քաղաքագետը։
Ես իմ թիմին միայնակ չեմ թողնի. Արթուր Վանեցյանը` խորհրդարան գնալ–չգնալու մասին
Հիշեցնենք` հունիսի 20-ին կայացած խորհրդարանական արտահերթ ընտրություններում անցողիկ շեմը հաղթահարել են ՔՊ-ն (53.92%) ու «Հայաստան» դաշինքը (21.04%)։ «Պատիվ ունեմ» դաշինքն էլ (5.23%) խորհրդարան կանցնի իրավունքի ուժով՝ որպես երրորդ ամենաշատ ձայներ ստացած քաղաքական ուժ։
«Պատիվ ունեմ» և «Հայաստան» դաշինքներն արդեն հայտարարել են, որ չեն ընդունում ընտրությունների արդյունքները և պատրաստվում են դիմել Սահմանադրական դատարան։ Ընդդիմադիր քաղաքական ուժերը դեռևս քննարկում են մանդատները վերցնել-չվերցնելու հարցը։
