ԵՐԵՎԱՆ, 21 հունիսի – Sputnik. Մոսկվան հույս է հայտնել, որ խորհրդարանական ընտրությունների արդյունքները կնպաստեն Հայաստանի զարգացմանը, Ռուսաստանի հետ հարաբերությունների հետագա ամրապնդմանը, ինչպես նաև Անդրկովկասում խաղաղության ապահովմանը: Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի հայտարարության մեջ։
Նշվում է, որ ընտրություններին հետևել են բազմաթիվ տեղական (8749) և արտասահմանյան դիտորդներ (483), այդ թվում ՝ Ռուսաստանից: Բացի այդ, ընտրություններին հավատարմագրվել են 68 տեղական և 49 արտասահմանյան ԶԼՄ-ներ:
Ինչպես հայտարարել է Հայաստանում ԱՊՀ դիտորդական առաքելության ղեկավար Իլհոմ Նեմատովը, երկրում ընտրություններն անցել են Ընտրական օրենսգրքի պահանջներին համապատասխան, դիտորդները չեն արձանագրել այնպիսի խոշոր խախտումներ, որոնք կարող են ազդեցություն ունենալ քվեարկության արդյունքների վրա: Համանման գնահատականներով հանդես են եկել ՀԱՊԿ-ի, ԵԱՀԿ / ԺՀՄԻԳ-ի և Եվրոպայի Խորհրդի Խորհրդարանական վեհաժողովի դիտորդական առաքելությունները:
«Ակնկալում ենք, որ ընտրական գործընթացի արդյունքները դրանց օրենսդրական ձևակերպումից հետո կնպաստեն Հայաստանի առաջընթաց զարգացմանը, ռուս-հայկական հարաբերությունների հետագա ամրապնդմանը, ինչպես նաև խաղաղության, անվտանգության և կայունության ապահովմանը ողջ Անդրկովկասյան տարածաշրջանում, նախևառաջ Հայաստանի, Ադրբեջանի և Ռուսաստանի ղեկավարների 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների լիակատար իրականացման առումով», - ասված է Ռուսաստանի ԱԳՆ կայքում հրապարակված մեկնաբանության մեջ:
Մոտ օրերս ռուս զինվորականները կհաստատվեն Գեղարքունիքում. Գնել Սանոսյան
Հիշեցնենք` հունիսի 20–ին Հայաստանում տեղի ունեցած խորհրդարանական ընտրությունների արդյունքներով «Քաղաքացիական պայմանագիր» կուսակցությունը ստացել է 687 251 քվե (53.92%), «Հայաստան» դաշինքը՝ 268 165 (21.04%), «Պատիվ ունեմ» դաշինքը՝ 66 633 (5.23%), «Բարգավաճ Հայաստան» կուսակցությունը՝ 50 419 (3.95), «Հանրապետություն» կուսակցությունը՝ 38 713 (3,04), «Հայ ազգային կոնգրես» կուսակցությունը՝ 19 674 (1.54), «Լուսավոր Հայաստան» կուսակցությունը` 15 557 (1.22)։
