ԵՐԵՎԱՆ, 21 հունիսի – Sputnik. ՀՀ քննչական կոմիտեն մանրամասներ է հայտնել «Մանախ» մականունով հայտնի ազատամարտիկ Արթուր Այվազյանի նկատմամբ հարուցված քրեական գործից։
Այսպես` ՀՀ քննչական կոմիտեի վարույթում քննվող քրեական գործով պարզվել է, որ 2021թ.հունիսի 9-ին՝ ժամը 01:33-ին, Արթուր Այվազյանը Facebook սոցիալական ցանցի իր անձնական էջում, ինչպես նաև «Հայոց ազգային բանակ» խմբում ուղիղ հեռարձակմամբ, անդրադառնալով ՀՀ-ում տեղի ունեցած մի շարք դեպքերի, մասնավորապես` օրեր առաջ ՀՀ և ԱՀ պետական սահմանին հայ զինվորին ադրբեջանցիների կողմից ծեծի ենթարկելու դեպքին, հայհոյանքներ է հնչեցրել ՀՀ ռազմաքաղաքական ղեկավարության, ՀՀ վարչապետի ժամանակավոր պաշտոնակատարի և այն անձանց հասցեներին, արտահերթ խորհրդարանական ընտրությունների ընթացքում կքվեարկեն ՀՀ վարչապետի ժամանակավոր պաշտոնակատարի ղեկավարած կուսակցության օգտին։
Իրավունքի տեսակետից սա գնահատվել է իբրև հասարակական կարգի կոպիտ խախտում ու հանրության նկատմամբ բացահայտ անհարգալից վերաբերմունք
Նշված հեռարձակման ընթացքում Արթուր Այվազյանը հնչեցրել է նաև նույն անձանց շրջանակի նկատմամբ բռնություն գործադրելու սպառնալիքներ, որը զուգորդվել է բացառիկ ցինիզմով:
Շիրակի մարզում ընտրողներին կաշառելու գործով ձերբակալվել է 5 անձ
Ձեռք բերված բավարար ապացույցների համակցությամբ՝ նրան մեղադրանք է առաջադրվել՝ ՀՀ քրեական օրենսգրքի 258-րդ հոդվածի 3-րդ մասի 5-րդ կետով (խուլիգանություն): Միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց կիրառելու վերաբերյալ:
Ինչպես արդեն հայտնել ենք, հունիսի 20-ին Արթուր Այվազյանը ձերբակալվել էր: Ձերբակալության իրավական հիմքը, սակայն, մինչ այդ չէր հանրայնացնել։
