ԵՐԵՎԱՆ, 20 հունիսի - Sputnik․ «Լուսավոր Հայաստան» կուսակցության նախագահ Էդմոն Մարուքյանը Երևանի ընտրատեղամասերից մեկում կատարեց իր ընտրությունը։ Քվեարկությունից հետո Էդմոն Մարուքյանը կարճ զրույց ունեցավ լրագրողների հետ։
«Քվեարկել եմ հանուն համերաշխության՝ վաղը երկրում հաշտությունը վերականգնելու համար։ Ես մեծ հույս ունեմ, որ համերաշխության և հաշտության վերականգնումն այլընտրանք չի ունենա մեզ համար, որովհետև մարտահրավերները շատ ավելի մեծ են, քան մենք ենք պատկերացնում։ Մենք պետք է մեր փոքրիկ ճշմարտությունները մի կողմ դնենք՝ հանուն ավելի մեծ ճշմարտության և արժեքի, որը մեր պետությունն է, մեր պետականությունը», - նշեց Մարուքյանը լրագրողների հետ զրույցում։
Նա ասաց, որ տասը տարվա «գզվռտոցը» պետք է ավարտվի։ Անդրադառնալով քարոզարաշվին՝ Մարուքյանը ասաց, որ լավ էր՝ սպասված բռնությունները տեղի չունեցան։
«Քարոզարշավի բառապաշարը և բառամթերքը անընդունելի էր, շատ էր ատելության և բռնության խոսքը։ Բայց եսիմ-ինչեր, որ սպասում էին, չեղավ, ու դա լավ է։ Բռնության ակնկալիքները այսօր էլ չեն իրականանա, հանգիստ է լինելու», - հույս հայտնեց Մարուքյանը։
Ընտրական խախտումների մասին խոսելով՝ Մարուքյանը ասաց, որ ընտրակաշառք տվող և վերցնող մարդկանց կարելի է «Իլհամ Ալիևի ուժ» կոչել։
«Ես հույս ունեմ, որ ամեն քաղաքացի ինքը որպես անհատ կորոշի՝ ինչպես է քվեարկելու; Դա դեմ է այն ամենին, ինչին մենք հասել ենք այս երկրում»,- ասաց Մարուքյանը։
Զինվորներին ուղղորդում են քվեարկել ՔՊ-ի օգտին. Աշոտյանն ահազանգում է
Նա նշեց, որ այս պահի դրությամբ ԼՀԿ-ի անդամները ոչ մի խախտում չեն նկատել։
Մարուքյանը նշեց, որ իր միջնեկ տղայի՝ Նարեկի հետ է եկել քվեարկության։ Նա ժպիտով ասաց, որ ամեն ընտրության գալիս է իր երեխաներից մեկի հետ։ Ասաց՝ հաջորդին դստեր՝ Էլիզաբեթի հետ կգա։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասերում։ Նշենք, որ տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջագային և օտարերկրյա դիտորդական առաքելություն իրականացնող կազմակերպությունների 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
