ԵՐԵՎԱՆ, 20 հունիսի – Sputnik. Դիջեյ Smoke-ը որդի է ունեցել` նրան անվանակոչելով Ապրիլյան պատերազմի ժամանակ զոհված Ադամ Սահակյանի պատվին։ Տեղեկությունը հրապարակվել է Ադամ Սահակյանի անունով բացված Facebook–յան էջում։
Դիջեյը Ադամի մորը` տիկին Գայանեին, նամակ է ուղարկել, որը հոր և փոքրիկի լուսանկարին կից հրապարակվել է նույն էջում։
«Երբ ապրիլյանի ժամանակ տեսա մեր բոլորի Ադամին, նրա հայացքը, աչքերը, իսկական հայ տղա, Աստծուց մի բան խնդրեցի, որ էլի տղա ունենամ (մեկն արդեն ունեի) ու անունը Ադամ դնեմ։ Հոգուս խորքում փափագում էի այդ պահը, ու Աստված ինձ տվեց այդ ուրախությունը։ Երեք ամիս առաջ ես որդի ունեցա ու նրան անվանակոչեցի ԱԴԱՄ՝ Ձեր որդու պատվին։ Երբ հարցնում են` ինչո՞ւ Ադամ, հպարտությամբ ասում եմ` մեր բոլորի Ադամի պատվին»,–ասված է տիկին Գայանեին ուղղված նամակում։
Հիշեցնենք, որ Ադամ Սահակյանը 2016-ի ապրիլին տեղի ունեցած հայ–ադրբեջանական պատերազմի հերոս է։ Ապրիլի 1-ի գիշերը՝ «Լալայկա» կոչվող բարձունքում ավագ Ադամ Սահակյանի գլխավորությամբ 7 հոգուց բաղկացած սահմանապահ ուժերն անցնում են շրջանաձև պաշտպանության` ադրբեջանական հարձակման դեմ։ Իր ընկերների հետ 5 ժամ շարունակ մարտնչելով թշնամու դեմ և հասցնելով նրան զգալի կորուստներ (200-ից ավելի սպանված հատուկջոկատային)` Սահակյանն ընկնում է հերոսի մահով։
Սահակյանի և նրա ընկերների` թշնամու դեմ մղած պայքարը հնարավորություն է տվել Ջաբրայիլի հայկական գնդին տեղակայվել ռազմաճակատի 2-րդ գծում և կանգնեցնել հակառակորդին։ Սահակյանը հետմահու պարգևատրվել է Արցախի Հանրապետության «Մարտական ծառայություն» և Հայաստանի Հանրապետության «Արիության» մեդալներով։
