ԵՐԵՎԱՆ, 18 հունիսի – Sputnik. «Տաշիր» ընկերությունների խմբի նախագահ Սամվել Կարապետյանը հանդես է եկել հայտարարությամբ` կապված առաջիկա խորհրդարանական ընտրությունների հետ։
«Ակնհայտ է, որ մեր հայրենիքում ստեղծված իրավիճակը առանձնանում է ծայրահեղ բարդությամբ։ Ծանր պարտություն տանելով հայրենական պատերազմում, մենք հայտնվել ենք աննախադեպ մի ճգնաժամի մեջ։ Ընդ որում, խոսքն ինչպես քաղաքական, տնտեսական, այնպես էլ արժեհամակարգային ճգնաժամի մասին է»,– ասվում է հայտարարության մեջ։
Այնուամենայնիվ, ռուսաստանաբնակ գործարարը վստահություն է հայտնում, այդ բազմաշերտ ճգնաժամը հնարավոր է հաղթահարել, և այդ ճանապարհը խաղաղ, ազատ ու արդար ընտրություններն են։
«Հասկանալի է, որ հունիսի 20-ին մենք ոչ թե պարզապես նոր խորհրդարան ու նոր կառավարություն ենք ընտրում, այլ պատրաստվում ենք ներկայացնել աշխարհին, մեր բարեկամներին ու թշնամիներին մեր էությունը։ Ներկայացնել այն ուղին, որով առաջիկա՝ բոլորիս համար շատ բարդ տարիներին, շարժվելու է Հայաստանը»,– նշում է Կարապետյանը։
Ռոբերտ Քոչարյանն ու Կարեն Կարապետյանը հանդիպել են կենտրոնական շտաբում․ լուսանկարներ
Նա նաև հույս է հայտնել, որ ողջամտությունն ու ազգապահպանության մղումը գերակա կլինեն, ընտրությունները կավարտվեն պաշտոնական տվյալների ամփոփմամբ, այլ ոչ թե ներքաղաքական լարվածության նոր շրջափուլով։
«Երկիրը հասարակական համերաշխության սուր կարիք ունի»,– արձանագրում է Կարապետյանը` վստահություն հայտնելով, որ հանրությունն ի զորու է հաղթահարել մարտահրավերը։
Իր հայտարարությունը «Տաշիր» ընկերությունների խմբի նախագահն ավարտում է «Հայաստան» դաշինքի նախընտրական կարգախոսով` նշելով. «Ես անկեղծ հավատում եմ, որ ամեն ինչ լավ է լինելու»:
Նշենք, որ թեև Սամվել Կարապետյանն իր հայտարարության մեջ որևէ քաղաքակա ուժի անուն չի նշում, բայց քարոզարշավին հետևողները գիտեն, որ նախընտրական քարոզարշավի ընթացքում «Հայաստան» դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանն իր նախընտրական գրեթե բոլոր ելույթներն ավարտում է «ամեն ինչ լավ է լինելու» կարգախոսով։ Այս կարգախոսը լայնորեն կիրառվում է նաև դաշինքի քարոզչական տեսանյութերում։
Հիշեցնենք` հունիսի 20–ին Հայաստանում անցկացվելու են արտահերթ խորհրդարանական ընտրություններ, որոնց մասնակցելու հայտ են ներկայացրել 21 կուսակցություն և 4 դաշինք։
Հունիսի 7–ից մեկնարկել է նախընտրական քարոզարշավը, որը կավարտվի ընտրություններից մեկ օր առաջ` հունիսի 19–ին։
«Մոնարխի» տնօրեն Սերգեյ Համբարձումյանը իր աջակցությունն է հայտնել Ռոբերտ Քոչարյանին
