ԵՐԵՎԱՆ, 18 հունիսի - Sputnik. Մայր աթոռը հորդորում է իրավապահ մարմիններին ազատ արձակել Մայր աթոռ Սուրբ Էջմիածնի «Իզմիրլյան» բժշկական կենտրոնի տնօրեն Արմեն Չարչյանին։ Տեղեկատվական կենտրոնը հաղորդագրություն է տարածել։
«Պրոֆեսոր Չարչյանը Եկեղեցու նվիրյալ զավակ է, անվանի բժիշկ, անբիծ կենսագրության անձնավորություն: Ուստի, հորդորում ենք իրավապահ պատկան մարմիններին անհապաղ ազատ արձակել պրոֆեսոր Չարչյանին և գործել բացառաբար օրենքի շրջանակներում՝ զերծ մնալով անձի արժանապատվությունն ու հեղինակությունը նսեմացնող և իրավունքները ոտնահարող գործողություններից»,- նշված է հաղորդագրության մեջ։
Հիշեցնենք` ոստիկանությունն այսօր ձերբակալել է Արմեն Չարչյանին, իսկ ՀՀ հատուկ քննչական ծառայությունում հարուցվել է քրեական գործ` իրեն ենթակա աշխատակիցների նկատմամբ ճնշում գործադրելու մեղադրանքվ։
Այսօր տարածված և Չարչյանին վերագրվող ձայնագրությունում նա նշում է, որ տնօրինությունը «շատ կոշտ, խիստ համարժեք վերաբերմունք է ցուցաբերելու» նրանց նկատմամբ, ովքեր ընտրություններին չեն մասնակցի։
