ԵՐԵՎԱՆ, 16 հունիսի - Sputnik. Մարդու իրավունքների պաշտպանի մշտադիտարկումը ցույց է տալիս, որ ատելության խոսքը տարածվում է սոցիալական ցանցերում, համակիրների շրջանում, ինչն ավելի է մեծացնում լարվածությունը և իրական կյանք տեղափոխվելու ռիսկեր է պարունակում։ Պաշտպանի աշխատակազմի քրեական արդարադատության ոլորտում և զինված ուժերում ՄԻՊ դեպարտամենտի ղեկավար Արտյոմ Սեդրակյանն այս մասին հայտնել է ԵԱՀԿ/ԺՀՄԻԳ ընտրությունների դիտորդական առաքելության ղեկավար պարոն Էողան Մերֆիի հետ հանդիպման ժամանակ` տեղեկանում ենք ՄԻՊ–ի ֆեյսբուքյան էջից։
«Սեդրակյանը ներկայացրել է աշխատակազմում ընտրությունների մշտադիտարկման նպատակով ստեղծված աշխատանքային խմբի գործունեությունը, որը նախընտրական և հետընտրական փուլերում, ինչպես նաև քվեարկության օրը կգործի արտակարգ ռեժիմով»,–նշված է Արման Թաթոյանի գրառման մեջ։
Բացի այդ, պաշտպանի աշխատակազմի Քաղաքացիական, սոցիալ-տնտեսական և մշակութային իրավունքների պաշտպանության դեպարտամենտի ղեկավար Արմեն Մաշինյանը ներկայացրել է մշտադիտարկման արդյունքում արձանագրված տվյալները` կապված ընտրակաշառք բաժանելու, վարչական միջոցի չարաշահման, այս կամ այն քաղաքական ուժին աջակցելու հիմքով աշխատանքից ազատելու հետ և այլն։
Բացառել վիրավորանքը, ատելությունը, թշնամանքի սերմանումը. ԿԸՀ–ն հայտարարություն է տարածել
Մարդու իրավունքների պաշտպանի աշխատակազմը կարևորել է ԵԱՀԿ/ԺՀՄԻԳ-ի կողմից ընտրությունների անաչառ դիտարկումը։
