ԵՐԵՎԱՆ, 14 հունիսի - Sputnik. Տեղ համայնքի ղեկավար Ներսես Շադունցը Sputnik Արմենիայի հետ զրույցում մանրամասներ է հայտնել, թե իրականում ինչպես են փրկվել ադրբեջանցիների վերահսկողության տարածքում հայտնված գյուղացիներն ու ինչի շնորհիվ են վերադարձվել հայկական կողմին։
Նրա խոսքով, տղաները անկախության տարիներին ծնված երիտասարդներ են, ովքեր խոտհունձի ժամանակ շփոթել են տարածքն ու շուջ 200-300 մետր մտել Ադրբեջանի կողմից վերահսկվող տարածք։
«Այդտեղ սկսել են խոտ հնձել։ Նրանց սահմանապահ զորքերի հենակետից 10 հոգի զինված մարդիկ են իջել, եկել մեր տղաներին շրջապատել են, ասել են` դուք մեր տարածք եք մտել։ Ասել են. «Դե որ ձերն է, մենք հետ կդառնանք», նրանք էլ թե` «չէ, հետ չեք դառնա, մենք բոլորս միասին գնալու ենք մեր տեղակայման վայր»։ Տղաները հրաժարվել են։ Նրանք զենք են պահել տղաների վրա։ Մեր տղաներից մեկն էլ մոտը նռնակ է ունեցել, հանել է, օղակը քաշել ու ասել. «Կա՛մ սաղս միասին գնում ենք էն աշխարհ, կա՛մ ես ձեր հետ չեմ գալիս»»,– պատմեց Շադունցը։
Այս սպառնալիքից հետո միայն ադրբեջանցիները տեղյակ են պահել հայկական կողմին։ Գյուղապետը դիմել է բանակային կորպուսի հրամանատարին, Սյունիքում տեղակայված ՌԴ սահմանապահ զորքերի հրամանատարին ու խաղաղապահ զորքերի հրամանատարին, ինչպես նաև` Սյունիքի մարզպետին։
Սև լճի շրջանում թուրքական բանակային ստորաբաժանման տեղակայման մասին խոսք չի գնում. ՊՆ
«Դրանից հետո գնացել ենք ռուսների հետ, էդ մարդիկ էդ հարցին լուծում են տվել։ Գյուղի երիտասարդությունն է միանգամից եկել, խառնվել իրար, մի կերպ զսպել ենք այդ էմոցիաները, որպեսզի լուրջ խնդիրներ չառաջանան»,– ասաց Շադունցը։
Սյունիքում այսօր առկա վիճակը Տեղի գյուղապետը համեմատում է 90-ականների սկզբի իրավիճակի հետ ու ամփոփում. «Սահմանն այստեղից 150 կմ հեռու էր, հիմա դարձավ 150 մետր»։
Գյուղապետի խոսքով, Տեղում լուրջ անասնապահական ներուժ էր զարգացել այս տարիների ընթացքում` 60 000 գլուխ մանր, 10 000 գլուխ խոշոր եղջերավոր անասուն, 1000-ավոր հեկտարներով հացահատիկի ցանքատարածություններ։ 2020թ–ից հետո համայնքի մանր եղջրավոր անասունների թվաքանակը 60 000-ից նվազել է մինչև 20 000–ի։
«3 անգամ տնտեսությունը հետ է գնացել։ Մարդիկ կային, որ հարյուրավոր տոննաներով ցորեն էին բերում, մշակում էին այդ հողերը, մարդիկ կային, որ իրենց տեխնիկան ունեին, օրավարձով տալիս էին»,– ասաց նա։
Հիշեցնենք` հունիսի 12-ին Սյունիքի Տեղ գյուղի 2 բնակիչ հայտնվել են ադրբեջանական տարածքում։ ՀՀ ՊՆ մամուլի ծառայությունը հայտնել էր, որ Ադրբեջանի հետ սահմանային հատվածում, գյուղատնտեսական աշխատանքներ կատարելու ընթացքում, մարզի գյուղերի երկու բնակիչ, իրենց տրակտորներով, տեղանքում ապակողմնորոշվելու հետևանքով հայտնվել են ադրբեջանական տարածքում:
Նշվում էր, որ միջադեպից քիչ հետո ժամանած հայ դիրքապահների և ռուս սահմանապահների` ադրբեջանցի զինվորականների հետ բանակցություններից հետո գյուղացիներն ազատ են արձակվել, գյուղատնտեսական տեխնիկան վերադարձվել է:
