Նախընտրական քարոզարշավն ընթանում է փոխադարձ վիրավորանքների ու մեղադրանքների մթնոլորտում։ Sputnik Արմենիայի հետ զրույցում նման կարծիք հայտնեց «5165» կուսակցության նախագահ, վարչապետի թեկնածու Կարին Տոնոյանը։
«Նոր ուժերը փորձում են իրենց ավելի զուսպ, ընտրական քարոզարշավի և էթիկայի կանոններին ավելի համապատասխան պահել, բայց այնուամենայնիվ կարծում եմ` փոխադարձ ատելության մթնոլորտ է տիրում»,- ասաց նա։
Նրա խոսքով` տարիներ շարունակ մարդկանց իրավագիտակցությունը իջեցվել է այնպիսի մակարդակի, որ նրանց մի մասն այսօր չի գիտակցում, որ նաև այս ընտրություններն են որոշելու իրենց կյանքի ու հայրենիքի լինելիության հարցը և, որ այս անգամ պետք է մի կողմ թողնել անհատին կուռք դարձնելու, մարդկանց իրար դեմ հանելու ճանապարհը։
«Երկու բևեռները փորձում են ժողովրդին մտցնել փակուղի, որ ընտրեն կա՛մ մեկին, կամ մյուսին։ Իրականում մեր հայրենիքը կշահի, եթե կարողանանք մարդկանց հասկացնել, որ միայն սևերն ու սպիտակները չեն։ Եվ որ ըստ իրենց ճաշակի, գիտակցության և խղճի, կարող են ընտրել նաև այլ գույներ ներկայացնող կուսակցություններ` ըստ ծրագրերի»,- նշեց Տոնոյանը։
Նրա կարծիքով` թեև մարդկանց իրավագիտակցությունը բարձրացնելու համար նախընտրական քարոզարշավին հատկացրած ժամանակը շատ քիչ է, սակայն հունիսի 7-ի և այսօրվա դրությամբ տարբերությունը նկատելի է։ Եթե սկզբում մարդիկ գրեթե չէին ճանաչում նորաստեղծ կուսակցություններին և նրանց առաջադրած թեկնածուներին, այսօր արդեն մարդկանց մի մասը նրանց որպես այլընտրանք է դիտարկում։
«Գիտակից մարդիկ հասկանում են, որ վերադարձ անցյալին չպետք է լինի, և հենց այս ուժերի առկայությունն է, որ հիմա մեզ խանգարում է դուրս գալ այս ճգնաժամից։ Ընտրազանգվածի մեջ և՛ փոփոխություն կա, և՛ որոշակի ակտիվացում եմ նկատում»,- հավելեց Տոնոյանը։
Արցախի նախկին նախագահները պատասխանել են իրենց հասցեին հնչող մեղադրանքներին
Համոզված եմ, որ անկանխատեսելի ընտրություններ են լինելու, և բոլոր սոցհարցումները որքան էլ որ համարվում են ճշգրիտ գիտություն, այս պարագայում սխալվելու են` հույս ունենալով նաև, որ հենց ընտրության օրը մեր ժողովուրդը ենթագիտակցորեն ժողովրդի փիլիսոփայությամբ և իմաստնությամբ կկատարի խղճի և մտոք ընտրություն, այսինքն` իր քվեն չի տա այս ատելությանը, հակադարձմանը կամ «ինադույի» գաղափարախոսությանը։
Նշենք, որ Հայաստանում հունիսի 7-ից պաշտոնապես մեկնարկել է խորհրդարանական ընտրությունների նախընտրական քարոզարշավը:
«Պատիվ ունեմը» չի բացառում, որ կարող է կոալիցիա կազմել «Հայաստան» դաշինքի հետ
Արտահերթ խորհրդարանական ընտրություններին կմասնակցեն 21 կուսակցություն և 4 դաշինք, որոնք պայքարում են Հայաստանի ընտրողների ռեգիստրում ընդգրկված 2 581 093 ընտրողների ձայների համար։
Հիշեցնենք, որ խորհրդարանական արտահերթ ընտրությունները կայանալու են հունիսի 20-ին։
