ԵՐԵՎԱՆ, 13 հունիսի – Sputnik․ Արդյոք եվրոպական առաջնորդների համար ընդունելի է ցուցադրել մուրճն ու դրանով սպառնալ քաղաքական հակառակորդներին։ Այս հարցով
ՀՀ Ազգային ժողովի անկախ պատգամավոր, Ընտրությունների վերահսկման կոմիտեի ներկայացուցիչ Նաիրա Զոհրաբյանը նամակով դիմել է ԵԱՀԿ/ԺՀՄԻԳ դիտորդական առաքելության ղեկավար Յոհան Մերֆիին։
Նշենք, որ այսօր Կոտայքի մարզի մի շարք համայնքներում նախընտրական հանդիպումների ժամանակ «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը ցուցադրում էր մուրճը, նշում, որ պողպատյա հեղափոխություն պետք է արվի և այլն։ Աբովյանում հանդիպման ժամանակ էլ նա ցույց տվեց մուրճն ու նշեց, որ դա պողպատե մանդատ է։
«Նրան, ում պետք ա հանել, էս պողպատե մադատով կարելի ա հանել, էնտեղ, որտեղ պետք ա մխել, էս մանդատով կարելի ա մխել»։
Դիտորդական առաքելության ղեկավարին ուղղված նամակում Նաիրա Զոհրաբյանը մեջբերում է վարչապետի պաշտոնակատարի խոսքն ու նշում․ «ԵԱՀԿ/ԺՀՄԻԳ-ից պահանջում ենք կա՛մ արձագանքել և հրապարակավ դատապարտել ՔՊ կուսակցության վարչապետի թեկնածու Նիկոլ Փաշինյանի վարքագիծը, կա՛մ փաստերով հիմնավորել, որ սա ընդունելի և սովորական վարքագիծ է եվրոպական առաջնորդների համար՝ ցուցադրել մուրճ և դրանով սպառնալ քաղաքական հակառակորդներին»,- նշված է նամակում։
«Հայաստան» դաշինքը նախընտրական ամփոփիչ հանրահավաք կանցկացնի Երևանի կենտրոնում
Նաիրա Զոհրաբյանը նամակում նաև ընդգծում է, որ մինչ այս պահը ԵԱՀԿ/ԺՀՄԻԳ-ը որևէ կերպ չի արձագանքել քարոզարշավի ընթացքում հնչող անընդունելի բառապաշարին և հասարակությանը միմյանց դեմ հանելու բռնության կոչերին։
