ԵՐԵՎԱՆ, 10 հունիսի - Sputnik. Այն, որ Հայաստանի հանրությունը մինչ օրս չգիտի, թե Ադրբեջանում քանի հայ գերի է պահվում ու թե քանի անհետ կորած կա, ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանի որակմամբ «ուղղակի խայտառակություն է»։ Նա այս մասին հայտարարեց այսօր Թալինում ընտրողների հետ հանդիպմանը։
«Անհետ կորածների ծնողները շատ ավելի ծանր վճակում են, որովհետև որևէ տեղեկություն չունեն,– ասաց նա,– և ամենից վատը, որ պետությունը ոչինչ չի անում այդ մարդկանց վիճակը թեթևացնելու համար։ Երբ 3 երեխա ունեցող անհետ կորածի կինն ասում է. «այսքան ժամանակ մեկը մեր դուռը չի ծեծել, չի հասցրել, թե ինչի կարիք ունենք», դու ուղղակի չգիտես ինչ ասել։
Խնդրի լուծումն, ըստ Քոչարյանի, Ադրբեջանի նկատմամբ միջազգային կառույցների ճնշումը մեծացնելն է, որպեսզի այդ երկիրը գիտակցի, որ գերիներին պահելով ինքը ոչինչ չի շահում, այլ հակառակը` միջազգային ասպարեզում վարկանիշ է կորցնում։
Քոչարյանի դիտարկմամբ, գերիների հարցով կոշտ քննադատական հայտարարություն առ այսօր արել է միայն եվրոպական մի կառույց, այն էլ մի քանի պատգամավորի միջամտության արդյունքում։
«Թող չմտածեն` վիճակն այնքան վատ է, որ ասում եմ` որդիս գնա, մյուս գերիները գան». Փաշինյան
«Ես կոնկրետ հարցադրում ունեմ. մեր ԱԳՆ–ն ի՞նչ է անում, կամ մեր պաշտոնյաները, խորհրդարանն ի՞նչ են անում։ Պետք է հստակ ասես. այսօր ես ամեն ինչ պիտի անեմ, որ առնվազն 10 երկրի խորհրդարան այդպիսի հայտարարությամբ հանդես գա, ու սկսես այդ ուղղությամբ աշխատել, պատվիրակություններ ես ձևավորում, ուղարկում»,– ասաց նա` հավելելով, որ Հայաստանն առ այսօր այս ուղղությամբ «զրո» աշխատանք է տարել։
«Հենց գերիների թեման բարձրանում է, ռուսների գրպանն են գցում։ Գերիների հարցով զբաղվողը դարձել է գեներալ Մուրադովը։ Ոնց որ մենք կապ չունենք դրա հետ։ Ոնց որ գեներալ Մուրադովն է մեղավոր, որ գերի են ընկել, գեներալ Մուրադովն էլ պարտավոր է գնալ՝ գերիներին բերել»,– ասաց Քոչարյանը։
ՀՀ վարչապետի պաշտոնակատար Նիկոլ Փաշինյանի այն հայտարարությունը, թե գերիները երկու ամիս էլ կնստեն ու դրա համար կներեն ՀՀ իշխանություններին, Քոչարյանն առնվազն անբարոյական է համարում։ Իսկ որդուն գերիների հետ փոխանակելու Փաշինյանի առաջարկին Քոչարյանն այսպես արձագանքեց. «Հո մենք միջնադարում չե՞նք ապրում։ Ուղղակի դա էժանագին պոպուլիստական մի տրյուկ է` կիսագիտակից ինչ–որ զանգվածի վրա ազդելու համար։ Պարզ է, որ չի լինելու դա, չէ՞։ Ո՞նց ես դու պատկերացնում` 21-րդ դարում ինչ–որ մեկը գնում է, նստում է, մյուսներին բաց են թողնում։ Լավ, էդ աստիճանի պրիմիտիվ դեբիլությունը մենք մինչև ե՞րբ պիտի տանենք»։
Նրա դիտարկմամբ, գերիների խնդիրն այն թեման չէ, որտեղ թույլատրելի են այդ կարգի նման էժանագին հնարքները։
Հիշեցնենք, որ Արցախյան 44-օրյա պատերազմից հետո, ոչ պաշտոնական տվյալներով, Ադրբեջանում են գտնվում մոտ 200 հայ գերի, այդ թվում՝ քաղաքացիական անձինք։ Հրադադարից ի վեր Հայաստան են վերադարձել 73 գերի։
