ԵՐԵՎԱՆ, 8 հունիսի - Sputnik. «Բարգավաճ Հայաստան» կուսակցության ղեկավար Գագիկ Ծառուկյանը պնդում է` պետք է գյուղնախարարությունը բացվի։ Նա այդպիսի հայտարարություն է արել Գավառում ԲՀԿ-ի նախընտրական քարոզարշավի ժամանակ։
«Չի կարա լինի 5 նախարարություն, մի ղեկավար. մի նախարարը մի ոլորտի համար պետք է պատասխան տա։ Այսօր ամբողջ գյուղատնտեսությունը մեռած է, չեն օգտագործում։ Չեն հասկանում, որ մի հեկտար տարածքում ցորեն ցանելու համար 120 000 դրամ է պետք, որը պետք է գյուղացին վարկ վերցնի։ Եվ այս դեպքում էլ իր շահույթը 50-60 000 դրամ է, այսինքն` գյուղատնտեսական վարկը 0 տոկոսով պետք է լինի»,–ասաց Ծառուկյանը։
Նրա խոսքով` գյուղացու մշակածը, արտադրածը չպետք է գետնին մնա, քանի որ ժողովրդին կերակրողը գյուղացին է։ Ծառուկյանը նշում է` գյուղացու մշակածը պետք է արտահանել։
Հիշեցնենք, որ Հայաստանում արտահերթ խորհրդարանական ընտրությունները նախատեսված են հունիսի 20-ին։
Քարոզարշավը մեկնարկել է հունիսի 8-ին ու կշարունակվի մինչև հունիս 18-ը ներառյալ։
