ԵՐԵՎԱՆ, 7 հունիսի - Sputnik. ՀՀ առաջին նախագահ, ՀԱԿ նախագահ, վարչապետի թեկնածու Լևոն Տեր-Պետրոսյանն այսօր ՀԱԿ ընտրական հավաքի ժամանակ մեկնաբանեց, թե ինչու ինքն ու ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը մերժեցին Փաշինյանի բանավեճի առաջարկը:
«Քոչարյանն իր ոճով կամ իր էությամբ շատ հոյակապ պատասխան տվեց, ասաց` ես Փաշինյանին ոչ թե բանավեճի, այլ մենամարտի եմ հրավիրում, ի դեպ, ցանկացած զինատեսակով: Այսինքն՝ պարսատիկից մինչև ատոմային ռումբ: Ես մերժեցի Փաշինյանին ուղղակի խղճահարությունից ելնելով: Խղճացի, որովհետև այդ բանավեճը Նիկոլի համար կարող էր ուղղակի ինքնասպանություն լինել»,- ասաց Տեր-Պետրոսյանը՝ հավելելով, որ դա ոչ թե իր խոսքն է, այլ Փաշինյանի:
Նա հիշեցրեց Փաշինյանի խոսքերը՝ ասված 2009 թ-ին, որ առաջին նախագահը մի վատ «խասյաթ» ունի՝ վերջում միշտ ճիշտ է դուրս գալիս:
«Ալիևին կրածը պարտվածի հետ ինչի՞ շուրջ բանավիճի». Փաշինյանին մերժեց նաև «Հայաստանը»
Անդրադառնալով Քոչարյանի այն մտքին, թե ԼՂ խնդրի իր տեսլականն արժանապատիվ խաղաղությունն է, Տեր-Պետրոսյանը հակադարձեց, որ դա կարող է լինել միայն արժանապատիվ կապիտուլյացիա:
Հիշեցնենք` Հայաստանում արտահերթ խորհրդարանական ընտրությունները կկայանան հունիսի 20–ին։ Մասնակցության հայտ է ներկայացրել 26 կուսակցություն ու դաշինք։ Նախընտրական քարոզարշավը մեկնարկել է այսօր`հունիսի 7–ին։
