ԵՐԵՎԱՆ, 5 հունիսի – Sputnik. Լոռու մարզում այսօր սպանություն է տեղի ունեցել։ Տեղեկությունը հայտնում է shamshyan.com–ը։
Ժամը 01։40-ի սահմանում ոստիկանության Սպիտակի բաժինը «Սպիտակ» բժշկական կենտրոնից ահազանգ է ստացել, որ «ձախ ազդրի վերին երրորդականի ծակած-կտրած վերք՝ ազդրային զարկերակի մկանների փակեղների վնասումով, զարկերակային արյունահոսություն, աջ աճուկափոշտային շրջանի ծակած-կտրած վերք, հեմոռագիկ անեմիկ շոկ, ագոնալ վիճակ, գլխուղեղի ցիլկուլյատոր հիպոքսիա» ախտորոշմամբ իրենց մոտ է տեղափոխվել մի քաղաքացի։
Հիվանդանոց են մեկնել ոստիկաններն ու քննիչները։ Բժիշկները նրանց հայտնել են, որ վիրավորը, վերակենդանացման բաժանմունքում գիտակցության չգալով, մահացել է։
Իրավապահները պարզել են, որ սպանվածը Լոռու մարզի Արևաշող գյուղի բնակիչ, 31-ամյա Տարոն Դունամալյանն էր, որին հիվանդանոց էին տեղափոխել մի քանի քաղաքացիներ։
Մինասյանների ընտանիքի դաժան սպանությունը. ողջ մնացած դուստրը մանրամասներ է պատմել
Փաստի առթիվ Սպիտակի քննչական բաժնում քրեական գործ է հարուցվել ՀՀ ՔՕ 104 հոդվածի 1-ին մասի (սպանություն) հատկանիշներով։
Կայքի տեղեկություններով՝ ոստիկաններն ու քննիչները պարզել են նաև, որ դեպքը տեղի է ունեցել նույն օրը, ժամը 00։40-ի սահմաններում Սպիտակ քաղաքից դեպի Արևաշող գյուղ տանող ճանապարհի սկզբնամասում։ Դեռևս ինքնությունը չպարզված անձը դանակով հարվածել է Դունամալյանի մարմնի տարբեր մասերին։
Ոստիկանությունն ու քննչական բաժինը անհրաժեշտ օպերատիվ-հետախուզական և քննչական համատեղ գործողություններ են ձեռնարկում սպանությունը բացահայտելու, դեպքի հանգամանքները պարզելու, կատարողին և հանցագործության գործիք առարկան հայտնաբերելու ուղղությամբ։
Հայտնի են դարձել Դոն Պիպոյի եղբոր սպանության մանրամասները. տեսանյութ
