Բայց ախր մրցակիցների վրա դույլերով կեղտաջուր լցնելը երբեմն անցնում է։ Շատ կոնկրետ օրինակ բերեմ։
1996 թվականին վարչապետի պաշտոնի համար առաջին անգամ պայքարող Բենիամին Նեթանյահուն ընտրարշավի սկզբում հետ էր մնում հակառակորդից՝ Շիմոն Պերեսից, մոտ 20 տոկոսով։ Իրավիճակն անհույս էր թվում, բայց Նեթանյահուն զանգահարեց Ամերիկայում բնակվող հայտնի քաղտեխնոլոգ Արթուր Ֆինկելշտեյնին, որը շատ պարզ խորհուրդ տվեց՝ վարդագույն ապագայի ծրագրեր ներկայացնելով և գեղեցիկ խոստումներ տալով մի՛ տարվիր, դրա փոխարեն ուղղակի վարկաբեկիր մրցակցիդ, տեսնենք` ինչպես է տակից դուրս գալու։
Հենց հաջորդ օրը Նեթանյահուի թիմը բոլոր լրատվամիջոցներով տարածեց. «Պերեսը, վարչապետ դառնալով, երկու մասի կբաժանի Երուսաղեմը և մի կեսը կհանձնի արաբներին»։
Բացարձակ սուտ։
Շիմոն Պերեսը երբեք նման մտադրության մասին իսկի չէր էլ ակնարկել։ Բայց սև գործն արված էր, և Նեթանյահուի մերձավորները, ձեռքերը հաճույքից շփելով, հետևում էին, թե ինչպես էր Պերեսը ողջ ընտրարշավի ընթացքում փորձում հերքել ու հերքել այն մեղադրանքը, որն ամենևին չէր համապատասխանում իրականությանը։ Իսկ Բենիամին Նեթանյահուն առաջին անգամ վարչապետ դարձավ։
Քավ լիցի, բոլորովին չեմ հորդորում մեր գործիչներին հետևելու նրա օրինակին և անհիմն վարկաբեկելու հակառակորդներին։ Ավելին, մեկ-մեկ մտածում եմ՝ իսկ միգուցե ընդհակառակը՝ հենց Ֆինկելշտեյնն է մեր քաղաքական ուժերից ընդօրինակել սև փիարի հնարքները, որովհետև գոնե այդ բնագավառում մերոնք ավանդաբար շատ ուժեղ են եղել։
Իսկ Նեթանյահուն ի վերջո ավելի քան 12 տարի եղավ վարչապետ՝ այդ ցուցանիշով գերազանցելով նույնիսկ Իսրայել պետության հիմնադիրներից մեկին՝ Դավիթ Բեն Գուրիոնին։ Սակայն նրա այդ վարչապետական մենաշնորհը կարծես թե ի վերջո մոտենում է ավարտին։
Ինչպես մեզ մոտ են հիմա հիմնական քաղաքական ուժերը բացեիբաց հայտարարում, թե իրենց գլխավոր նպատակը վարչապետի պաշտոնակատարից ազատվելն է, այնպես էլ Իսրայելի 8 քաղաքական ուժեր երկարատև ու դժվար բանակցություններից հետո ի վերջո անցած կեսգիշերին հայտարարեցին՝ հաջողվել է համաձայնության գալ այնպիսի կոալիցիայի շուրջ, որտեղ Բենիամին Նեթանյահուն և նրա կողմնակիցները տեղ չեն ունենալու։ Կա, իհարկե, մի վերապահում՝ այս որոշումը առաջիկա 10 օրվա ընթացքում պետք է հաստատի խորհրդարանը, բայց Նեթանյահուի հակառակորդները հուսով են, որ նրան այլևս չի հաջողվի իր կողմը ձգել պատգամավորներին։
Եթե սպասեք, որ վերևից ինչ-որ բան գա, դա էլ հենց ստրկությունն է. Բիտովը` Հայաստանի մասին
Ո՞վ է նրանց վարչապետը։ Որքան էլ մեզ, հայաստանցիներիս, համար անսովոր ու անհասկանալի թվա, բայց այդ վարչապետները երկուսն են։ Այո, այո՛, ճիշտ ֆուտբոլի նման, որտեղ կա հիմնական կազմ և պահեստային խաղացողներ, Իսրայելն էլ առաջիկա տարիներին կունենա մեկ հիմնական և մեկ պահեստային վարչապետ, որոնք երկու տարուց կփոխվեն տեղերով՝ պահեստային Յաիր Լապիդը կզբաղեցնի վարչապետական նստավայրը, իսկ Նաֆթալի Բենետը կլքի խաղադաշտը և տեղ կզբաղեցնի պահեստայինի նստարանին։ Այսինքն` առաջիկա երկու տարվա ընթացքում Իսրայելի վարչապետն է լինելու հենց Նաֆթալի Բենետը։
Չեք հավատա, բայց այս մարդու գլխավորած ուժը պառլամենտում ունի 7 պատգամավոր։ Պատկերացնո՞ւմ եք՝ ընդամենը 7 մանդատ 120-հոգանոց խորհրդարանում, այնինչ մենք սովոր ենք, որ միայն մեծամասնություն շահած կուսակցությունը կարող է տալ նոր վարչապետի անունը։ Համաձայնե՛ք՝ Իսրայելում տեղի ունեցողը կարծես կենարար մեռոն լինի մեր բազմաթիվ կուսակցությունների համար, որոնք, իհարկե, հպարտորեն հայտարարում են՝ մեծամասնություն ենք շահելու, բայց սրտի խորքում լավ էլ հասկանում են՝ հազիվ մի 7 մանդատ ստանան։ Պարզվում է՝ 7 մանդատով էլ կարելի է վարչապետ դառնալ։
«Մենք իրավունք ունենք հպարտանալու պարտությամբ». դավադրության տեսությունն ու իրականությունը
Եվ շատ կարճ այն մասին, թե ով է Իսրայելի նոր վարչապետը։ Նրանք, ովքեր հույս ունեին, որ իշխանության է գալու, այսպես ասենք, «խաղաղության վարչապետը», չարաչար սխալվել են։ Եթե Նեթանյահուին բազե էին կոչում, ապա Բենետին կարելի է անվանել «բազեների բազե»։ Միայն երկու մեջբերում անեմ։ Հեռուստաբանավեճերից մեկի ժամանակ արաբ պատգամավորի այն պնդմանը, թե հրեաները պետք է դուրս գան Հորդանան գետի արևմտյան ափից, Բենետը առանց այլևայլության հակադարձել է. «Մենք այս տարածքներում հրեական պետություն ենք ունեցել այն ժամանակ, երբ դուք չէիք էլ իջել ծառերից»։ Իսկ մի քանի ամիս առաջ տված հարցազրույցում նա բառիս բուն իմաստով այս հարցին վերջակետ դրեց՝ ասելով. «Ես իսրայելական հողի մի սանտիմետր էլ չեմ տա ոչ մեկին։ Էլ չշարունակենք։ Վերջակե՛տ»։
Ուզո՞ւմ եք վարչապետի կին դառնալ՝ օգնեք նրան հաղթել ընտրություններում
