ԵՐԵՎԱՆ, 3 հունիսի – Sputnik. ՀՀ վարչապետի պաշտոնակատար Նիկոլ Փաշինյանն այսօր կառավարության նիստի մեկնարկին անդրադարձավ Աբովյանի դատաբժշկական կենտրոնի դիահերձարանում նկարահանված ծանր տեսարանին ու դրա շուրջ բարձրացած աղմուկին։
«Ֆունդամենտալ հարցը, որ, կարծում եմ, պետք է պատասխան ստանա, հետևյալն է` արդյո՞ք սա պետության կամ կառավարության վերաբերմունքն է արտահայտում զոհված զինվորների և ընդհանրապես հանգուցյալների նկատմամբ»,– ասաց Փաշինյանը։
Իսկ հարցի պատասխանը ստանալու համար նա նախ առաջարկեց առողջապահության նախարարի պաշտոնակատարին ներկայացնել 2018թ–ից հետո դատաբժշկական ոլորտում իրականացված բարեփոխումները։
ԱՆ պաշտոնակատար Անահիտ Ավանեսյանը նշեց, որ մինչև 2018թ–ը դատաբժշկական կենտրոն է գործել միայն Երևանի դիահերձարանում և ունեցել է 25 սառնարանային տեղ, իսկ մարզերում ընդհանրապես մասնաճյուղեր չի ունեցել։
Այսօր երևանյան դիահերձարանի կարողությունը շուրջ 200 սառնարանային տեղ է։Մասնաճյուղեր են բացվել Աբովյանում, Գյումրիում, Մարտունիում, Մեծամորում, Վանաձորում, Եղեգնաձորում, Սևանում ու Գորիսում։
Համակարգի բյուջեն 2018թ–ի համեմատ 2019-ին աճել է 117 մլն դրամով կամ 32 տոկոսով, իսկ 2020–ին` 63 տոկոսով կամ 230 մլն դրամով։
Բացի այդ, Հայաստանում առաջին սարքավորումը, որով կարելի է ԴՆԹ հետազոտություն իրականացնել, հայտնվել է միայն 2019թ–ին, երկրորդը ձեռք է բերվել արդեն արցախյան 44-օրյա պատերազմից հետո։
Իսկ թե ինչու է այս բարեփոխումների արդյունքում ի հայտ եկել այն իրողությունը, որն արդեն երկու օր քննարկվում է հանրային բոլոր հարթակներում, Փաշինյանն այսպես մեկնաբանեց. «Մենք փոխում ենք համակարգը, բայց մարդուն փոխելն այնքան էլ հեշտ չէ։ Այստեղ հիմնականը մտածողության խնդիրն է»։
Նրա խոսքով` կառավարության վերաբերմունքի մասին էլ վկայում են ոլորտում կատարված բարեփոխումներն ու այն, որ տվյալ միջադեպի հետ առնչություն ունեցող բոլոր անձինք ազատվել են աշխատանքից։
Հիշեցնենք` հասարակության շրջանում մեծ աղմուկ է բարձրացրել սոցցանցերում հրապարակված լուսանկարը, որում երևում է, որ Աբովյանի դիահերձարանում զինծառայողների մասունքները պարկերով նետված են գետնին։
Դեպքի առնչությամբ ՀՀ ԱՆ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի վարիչը և այս գործընթացում ընդգրկված 2 աշխատակից ազատվել են աշխատանքից:
ՊՈԱԿ-ի տնօրենը ստացել է խիստ նկատողություն:
«Իմ բացթողումն է». Անահիտ Ավանեսյանը` դիերի և մասունքների ոչ պատշաճ պահման դեպքի մասին
