ԵՐԵՎԱՆ, 2 հունիսի - Sputnik. Նավթն ու բենզինն առաջիկա 4 տարիներին չեն էժանանա, բայց Հայաստանում ինչ–որ ձևով էժան բենզին է հայտնվել։ Այս մասին այսօր ԱԺ–ում հայտարարեց ՀՀ ՏՄՊՊՀ նախագահ Գեղամ Գևորգյանը` վկայակոչելով ԵԱՏՄ շուկայի վերլուծության արդյունքները։
«Բենզինի շուկայում տեղի են ունեցել բավական լուրջ փոփոխություններ։ Միայն այն հանգամանքը, որ շուկա անընդհատ տնտեսվարողներ են մտնում–դուրս գալիս, դա նշանակում է, որ ոչ մի խոչընդոտ չկա։ Իսկ այս տարվա ներմուծող ֆիրմաների անվանումներն, անկեղծ ասած, նույնիսկ ես չեմ հիշում։ Այսինքն` այն ավանդական ընկերությունները չեն»,– ասաց Գևորգյանը։
ՏՄՊՊՀ նախագահը հերքեց մամուլի հրապարակումները, թե հայտնի գործարարներից մեկը գնել է «Ռան Օյլ» ընկերությունը։
Հիշեցնենք` 2020թ–ի փետրվարի 18-ին հայտնի էր դարձել, որ գործարար Խաչատուր Սուքիասյանին պատկանող «Սիլ կոնցեռնը» ձեռք է բերել «ՌԱՆ ՕՅԼ»-ը:
Կոնցեռնի մամուլի խոսնակ Աննա Մկրտչյանը Sputnik Արմենիայի հետ զրույցում հաստատել էր լուրը` միաժամանակ վստահեցնելով, որ «Սիլ կոնցեռնը» Հայաստանում մենաշնորհ հաստատելու որևէ միտում չունի:
ՀՀ ՏՄՊՊՀ–ն էլ Sputnik Արմենիայի հարցմանն ի պատասխան հայտնել էր, որ նշված ընկերություններից դիմում չի ստացել համակենտրոնացման հայտարարագրման վերաբերյալ։
Խոսելով բարձր կենտրոնացում ունեցող ապրանքային այլ շուկաների մասին` Գևորգյանը նշեց, որ շաքարավազի շուկան կայունացել է, բայց գինը չի նվազել։ Իսկ կարագի շուկայում 2 ամիս հետո նոր թանկացում է կանխատեսվում։
«Այսօր արդեն Նոր Զելանդիայում ձեռք բերման գինը 4000-ից դարձել է 6000 դոլար»,– ասաց նա` միաժամանակ, սակայն, հավելելով, որ նույն միջազգային շուկայի կանխատեսումներով` նոյեմբերին կարագի գները դարձյալ նվազելու են։
Առաջ կարողանում էինք 10 000 դրամով նորմալ գնումներ անել. քաղաքացիները` թանկացումների մասին
