ԵՐԵՎԱՆ, 2 հունիսի-Sputnik. Ռուսաստանի հավաքականի լայն ցուցակում Արսեն Զախարյանը անունը նշվում էր, բայց հայազգի 17-ամյա ֆուտբոլիստը, որը հիվանդության պատճառով չմասնակցեց թիմի ուսումնամարզական վերջին հավաքին, չի մասնակցի նաև հին աշխարհամասի հերթական առաջնությանը։ Անկախ ամեն ինչից Հայաստանի հավաքականի նախկին ավագ Երվանդ Սուքիասյանը Sputnik Արմենիայի հետ զրույցում նշեց, որ Արսեն Զախարյանը դեռևս իր մասին խոսել կտա բոլորին։
-Երվանդ, դու Արսեն Զախարյանի խաղերին հետևե՞լ ես, ծանո՞թ ես նրա խաղային որակներին։
-Չեմ ասի, որ միշտ հետևել եմ, բայց շատ հանդիպումներ նրա մասնակցությամբ դիտել եմ։ Արսենը իր տարիքին ոչ բնորոշ (Զախարյանը 17 տարեկան է) հասուն ֆուտբոլ է ցուցադրում։ Արագությունն ու դրիբլինգը նրա այցեքարտն եմ համարում։ Բացի այդ, Զախարյանը շատ համարձակ ֆուտբոլիստ է և երբեք չի վախենում պայքարի մեջ մտնելուց։ Ֆուտբոլային լեզվով ասած՝ ոտքը չի քաշի գնդակից, եթե կոնտակտի վտանգ կա։ Իզուր չէ, որ հայ ֆուտբոլիստին ընտրել են որպես Մոսկվայի «Դինամոյի» ամսվա լավագույն ֆուտբոլիստ։
- Դու շատ մտերիմ հարաբերությունների մեջ ես Չերչեսովի հետ։ Մինչև հունիսի 1-ին կայացած Լեհաստան-Ռուսաստան ընկերական խաղը Չերչեսովը իր հավաքականի հետ Ավստրիայում ուսումնամարզական հավաք անցկացրեց։ Իսկ դու բնակվում ես Ավստրիայում։ Հանդիպե՞լ եք։
- Այո, ես մտերիմ հարաբերությունների մեջ եմ Ստանիսլավ Չերչեսովի հետ, և նա իմ կողմից շատ հարգված անձնավորություն է։ Դե իհարկե հանդիպել ենք։ Չերչեսովը հիմա իր ամբողջ գիտելիքներն ու ուժը ուղղել է Ռուսաստանի հավաքականի նախապատրաստական վերջին փուլին։ Նա ամեն ինչ անում է, որպեսզի հավաքականը լավ արդյունքների հասնի։ Զրույցներից մեկի ժամանակ խոսել ենք Զախարյանի մասին։ Դե եթե Ռուսաստանի հավաքականի մարզիչը հրավիրել է ֆուտբոլիստին, ուրեմն որոշակի հույսեր է կապում նրա հետ։ Չերչեսովը երբեք հաշվի չի առնում ֆուտբոլիստի տարիքը։ Նրա համար կարևորը ֆուտբոլիստի գործողություններն են խաղադաշտում՝ լինի նա 17, թե 35 տարեկան, կապ չունի։ Եթե համապատասխանում է պահանջներին, ուրեմն հավաքականում նրան անպայման սպասում են։
«Ալաշկերտը»` չեմպիոն. թիմը 4-րդ անգամ դարձավ Հայաստանի ֆուտբոլի մրցաշրջանի հաղթող
- Արսեն Զախարյանը, փաստորեն դեռևս չի խաղացել Ռուսաստանի ազգային հավաքականի կազմում։ Ի՞նչ ես կարծում, հնարավորություն կա՞, որ Զախարյանը մտափոխվի ու հանդես գա Հայաստանի ազգային հավաքականում։
-Յուրաքանչյուր ֆուտբոլիստ ինքն է ընտրում, թե որ հավաքականում խաղա, իհարկե, եթե հրավեր ունի։ Զախարյանը հայ է, բայց ֆուտբոլ խաղալը սովորել է Ռուսաստանում, ու նրան արդեն այնտեղ գնահատել են։ Դժվար է պատկերացնել, որ Զախարյանն այս պահին կմտափոխվի։ Բացի այդ, Ռուսաստանի ազգային հավաքականը կարող է այլ ապագա ապահովել Զախարյանի համար։ Միանշանակ պատասխանել չեմ կարող, բայց կարծում եմ՝ եթե Զախարյանը ուզեր, արդեն Հայաստանի ազգային հավաքականում կխաղար, քանի որ, եթե չեմ սխալվում, արդեն հրավեր եղել է։ Ինչևէ, Զախարյանին ես առողջություն ու արագ վերադարձ եմ ցանկանում խաղադաշտ։ Ես էլ կուզենայի, որ նրա նման ֆուտբոլիստը խաղար Հայաստանի հավաքականում։ Բայց դա Զախարյանի գործն է, և ոչ ոք չի կարող նրա որոշումը սխալ համարել։
