ԵՐԵՎԱՆ, 1 հունիսի - Sputnik. Փարիզում աշխատանքային այցով գտնվող ՀՀ վարչապետի պաշտոնակատար Նիկոլ Փաշինյանը ՀՀ դեսպանությունում հայ համայնքի ներկայացուցիչների հետ հանդիպմանը մեկնաբանեց փողոցւմ իրականացվող բողոքի ցույցը իր դեմ։ Այս մասին հաղորդում է «Արմենպրես»-ը։
«Մեր սիրելի հայրենակիցները բողոքի ակցիա էին անում դեսպանությունից քիչ հեռու։ Դա իրենց իրավունքն է, սակայն կարծում եմ, որ դա հարցից խուսափելու ձև է, ես կցանականայի հստակ հնչեր, թե ինչում է մեր կառավարության դավաճանությունը։ Ես ուշադիր եմ մեր հասցեին հնչող մեղադրանքներին, լսում եմ բոլոր փաստարկները»,֊ ասել է Փաշինյանը։
Նիկոլ Փաշինյանը նշել է, որ կարևորում է հանդիպումները համայնքների հետ, անդրադարձել է վերջին պատերազմական զարգացումներին, ղարաբաղյան հարցին։
«Ղարաբաղի հարցը լուծված չէ, սպառնալիքը նույնն է, ու դա ամենամեծ խնդիրն է, որ ունենք։ Իմ ընկալումն այն է, որ պետք է առերեսվել այդ մարտահրավերների հետ հայ ժողովրդի համար խաղաղ դարաշրջան ստեղծելու համար։ Տարիները ցույց տվեցին, որ ոչ զիջողականությունը, ոչ ճկունությունը չեն նվազեցնում ագրեսիվությունը մեր նկատմամբ։ Մեր մարտահրավերը մնում է նույնը՝ ինչպես կառավարել այն ագրեսիվությունը, որը ձևավորել է Հայաստանի շուրջ»,- ասել է հանդիպմանը Նիկոլ Փաշինյանը։
Նիկոլ Փաշինյանը Փարիզում ծաղիկներ է խոնարհել Շառլ Ազնավուրի կիսանդրու առաջ. տեսանյութ
Հիշեցնենք՝ Նիկոլ Փաշինյանն երկօրյա աշխատանքային այցով գտնվում է Փարիզում, որտեղ նախատեսվում են մի շարք հանդիպումներ երկրի բարձրաստիճան ղեկավարության հետ: Նա արդեն հանդիպել է երկրի նախագահ Էմանուել Մակրոնի, Ազգային ժողովի նախագահ Ռիշար Ֆերանի, Սենատի նախագահ Ժերար Լարշեի, Փարիզի քաղաքապետ Անն Իդալգոյի հետ։
Ֆրանսիայում ՀՀ դեսպանության մոտ մի քանի տասնյակ հայեր բողոքի ակցիա էին կազմակերպել Նիկոլ Փաշինյանի դեմ և փորձել էին թույլ չտալ նրա ավտոշարասյան մուտքը դեսպանատուն։
