ԵՐԵՎԱՆ, 30 մայիսի - Sputnik. ՀՀ կենտրոնական ընտրական հանձնաժողովը հայտնել է, թե ինչպես կարող են ընտրություններին մասնակցել հաշվառում չունեցող քաղաքացիները։
«ՀՀ-ում հաշվառում չունեցող ընտրողը մինչև հունիսի 10-ը կարող է դիմում ներկայացնել անձնագրային և վիզաների վարչություն կամ անձնագրային ծառայություն ընտրողների ցուցակում ժամանակավորապես ընդգրկվելու համար՝ նշելով քվեարկության օրը ՀՀ–ում գտնվելու վայրի հասցեն»,–նշված է հաղորդագրության մեջ։
Դիմումը ստանալուց հետո` եռօրյա ժամկետում, ընտրողն ընդգրկվում է քվեարկության օրը ՀՀ–ում գտնվելու վայրի ընտրական տեղամասի ընտրողների ցուցակում և այդ մասին նրան տրամադրվում է տեղեկանք:
Այլ անձի անունից դիմում ներկայացնելու դեպքում լիազորագրի համար պարտադիր նոտարական վավերացում չի պահանջվում:
Ընտրություններին ընդառաջ անձնագրային և վիզաների վարչությունը կաշխատի նաև հանգստյան օրերին
Հիշեցնենք, որ հունիսի 20-ին Հայաստանում կանցկացվեն արտահերթ խորհրդարանական ընտրություններ, քվեարկությունը կմեկնարկի առավոտյան 08։00-ից մինչև 20։00։ Իսկ էլեկտրոնային քվեարկությունը կմեկնարկի 2021թ–ի հունիսի 11-ին և կավարտվի հունիսի 13-ին։
