ԵՐԵՎԱՆ, 28 մայիսի – Sputnik. ՌԴ պաշտպանության նախարար, բանակի գեներալ Սերգեյ Շոյգուն ու ՀՀ պաշտպանության նախարարի պաշտոնակատար Վաղարշակ Հարությունյանն այսօր աշխատանքային հանդիպում են անցկացրել Մոսկվայում։ Տեղեկությունը հայտնում է ՌԻԱ Նովոստին։
Նշվում է, որ Շոյգուն առաջարկել է տարածաշրջանային անվտանգության հարցեր քննարկել:
«Մենք կքննարկենք տարածաշրջանային անվտանգության հարցերը՝ կապված Լեռնային Ղարաբաղում խաղաղապահ ուժերի աշխատանքի հետ, բայց նաև բոլոր սուր խնդիրները, որոնք ծագել են այս պահին», - ասել է Շոյգուն:
Հարությունյանն էլ ավելացրել է, որ մտադիր է համագործակցությանը վերաբերող հարցեր քննարկել, որը, նրա գնահատմամբ, շատ հաջող է զարգանում։
Շոյգուն նշել է, որ Ռուսաստանն ու Հայաստանն ամրապնդում են ռազմական փոխգործակցությունը ինչպես երկկողմ ձևաչափով, այնպես էլ միջազգային կառույցների՝ առաջին հերթին ՀԱՊԿ–ի շրջանակում:
«Հաջողությամբ իրականացվում են մեր զինված ուժերի զորքերի միացյալ խմբավորման, ինչպես նաև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգի ստեղծման համաձայնագրերը։ Երկկողմ համագործակցության բարձր մակարդակի ցուցանիշը Հայաստանում 102-րդ ռուսական ռազմակայանի գործունեությունն է, որը դիտարկում ենք որպես տարածաշրջանային անվտանգության ապահովման կարևոր գործոն», - ասել է նա:
Շոյգուն շնորհավորել է Հարությունյանին և ողջ հայ ժողովրդին պետական տոնի՝ Հանրապետության օրվա կապակցությամբ:
Նախարարը հիշեցրել է, որ հայկական ռազմական պատվիրակություններն ավանդաբար մասնակցում են Ռուսաստանի պաշտպանության նախարարության կարևոր միջոցառումներին: Նա Հարությունյանին հրավիրել է մասնակցելու հունիսին կայանալիք միջազգային անվտանգության հարցերի մոսկովյան IX համաժողովին։
«Օգոստոս-սեպտեմբերին սպասում ենք Հայաստանի Հանրապետության ներկայացուցիչներին Բանակային միջազգային խաղերին և «Բանակ-2021» միջազգային ռազմատեխնիկական համաժողովին», - հավելել է Շոյգուն:
ՀՀ պաշտպանության նախարարի պաշտոնակատարը Մոսկվա է մեկնել երեկ առավոտյան։
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Գերեվարված հայ զինծառայողները գտնվել են ՀՀ տարածքում. ՊՆ-ն քարտեզ է ներկայացրել
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Բացի այդ, մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի կողմից արձակված կրակոցներից մահացու վիրավորում է ստացել զինծառայող, կրտսեր սերժանտ Գևորգ Խուրշուդյանը:
Իսկ մայիսի 26–ի լույս 27–ի գիշերը ադրբեջանական կողմը Գեղարքունիքի սահմանային հատվածում 6 հայ զինծառայող է գերեվարել։
