ԵՐԵՎԱՆ, 27 մայիսի – Sputnik. Եթե Ադրբեջանը Գեղարքունիքի տարածքից գերեվարված զինծառայողներին չվերադարձնի ժամերի կամ օրերի ընթացքում, նրանք կփոխանակվեն գերիների հետ։ Այսօր լրագրողների հետ ճեպազրույցում նման հայտարարություն արեց ԱԺ «Իմ քայլը» խմբակցության անդամ, պաշտպանության ու անվտանգության հարցերի մշտական հանձնաժողովի նախագահ Անդրանիկ Քոչարյանը։
«Մենք գերի չունենք, բայց երեկ իրենք էլ նոր գերիներ չունեին»,– լրագրողների հարցերին ի պատասխան իր հայտարարությունը մեկնաբանեց Քոչարյանը։
Նրա խոսքով` Ադրբեջանը, հայ զինծառայողներին առևանգելով, սահմանային շատ ծանր նոր իրավիճակ է առաջացրել թե՛ Հայաստանի, թե՛ իր և թե՛ տարածաշրջանի համար։
Նշենք, որ ՀՀ ՊՆ տարածած հաղորդագրության համաձայն` այսօր առավոտյան ՀՀ Գեղարքունիքի մարզի սահմանային հատվածում, ՀՀ ԶՈւ N զորամասի պահպանության տարածքում ինժեներական աշխատանքներ կատարելիս ադրբեջանական զինված ուժերի զինծառայողների կողմից շրջափակվել և գերեվարվել են ՀՀ ԶՈւ վեց զինծառայողներ։
Հայտնի են գերի ընկած զինվորականների անունները
Հիշեցնենք` ադրբեջանցի զինվորականները մայիսի 12-ից Հայաստանի Սյունիքի մարզում գտնվող Սև լճի տարածքում են և փորձում են ամրապնդվել այնտեղ։ Նմանատիպ իրավիճակ է նաև Գեղարքունիքի մարզի Կութ, Վերին Շորժա և Նորաբակ գյուղերի հատվածում։
Ռուսական կողմի միջնորդությամբ բանակցությունների մի քանի փուլ է կայացել։ Հակառակորդն առայժմ հեռանալու մտադրություն դեռ չունի։ Հայաստանը դիմել է ՀԱՊԿ-ին և ռազմական օգնություն խնդրել Ռուսաստանից։
Ռազմաքաղաքական ղեկավարությունը հայտարարում է, որ ցանկանում է խնդիրը լուծել խաղաղ ճանապարհով, բայց չի բացառում նաև ուժի կիրառման տարբերակը, եթե բանակցությունները արդյունք չտան։
Մայիսի 25-ին Գեղարքունիքի մարզի Վերին Շորժա գյուղի հատվածում հակառակորդի արձակած կրակոցներից զոհվել է զինծառայող, կրտսեր սերժանտ Գևորգ Խուրշուդյանը:
